Qurmanǵazy atyndaǵy Qazaq ulttyq konservatorııasynyń «Halyq mýzykasy» fakýltetinde «Halyq áni», «Dombyra» jáne «Qobyz-baıan» syndy úsh kafedra bolsa, endi taǵy bir «Úsh ishekti jáne folklorlyq aspaptar» kafedrasymen tolyqty.
2024 jyldyń 26 maýsymdaǵy Qurmanǵazy atyndaǵy Qazaq ulttyq konservatorııasy Ǵylymı keńesiniń sheshimimen Halyq mýzykasy fakýltetinde jańa «Úsh ishekti jáne folklorlyq aspaptar» kafedrasy ashyldy.
Professor, kúıshi-kompozıtor Tólepbergen Toǵjanov «Halyq mýzykasy» fakýltetiniń dekany bolǵan 2 jyl ishinde qazaqtyń ulttyq mýzykasy tarıhynda eleýli jańalyqtar jasap jatqanyn basa aıtýymyz kerek.
Professor T.Toqjanov byltyr «Dombyra» kafedrasynda «Úsh ishekti dombyrany» mamandyq retinde engizip, stýdentter qabyldaǵan bolatyn. Qazaqtyń mýzykalyq aspaptaryn oqytý aıasyn keńeıtý jolyndaǵy T.Toqjanovtyń izdenisteri men eńbekteri nátıjeli bolyp, bıyl jańa bir kafedrany ashýǵa qol jetkizip otyr.
Konservatorııa ashylǵan 80 jyl ishinde tuńǵysh ret ashylyp otyrǵan «Úsh ishekti dombyrany» mamandyǵy jáne «Úsh shekti jáne folklorlyq aspaptar» kafedrasynyń ashylýyna konservatorııa rektory Nurken Áshirov pen Oqý jáne oqý-ádistemelik jumystar jónindegi prorektory Gúlnar Ábdirahmannyń eńbegi orasan.
«Qazaq óneri men mádenıetine qosylǵan jańa «Úsh shekti jáne folklorlyq aspaptar» kafedrasy qutty bolsyn! Halqymyzdyń mýzyka óneri álemge tanylyp, rýhanı muramyzǵa aınalýy, ulttyq aspaptarymyzdyń damýy úshin ony jastarǵa oqytý aıasyn da keńeıtýge barymyzdy salyp jatyrmyz. Jańa kafedra quramynda sherter, sybyzǵy, jetigen, saz-syrnaı, dombyra-prıma, dombyra-bas aspaptary bar.
Jańa kafedra – ulttyq mýzykamyzdy oqytý isindegi jańa belesimiz. Konservatorııa ákimshiligine, prorektor Gúlnar Ábdirahmanǵa jáne jańa kafedranyń mańyzyn sezinip qoldaǵan Ǵylymı keńes múshelerine alǵysym men rızashylyǵymdy bildiremin», – deıdi «Halyq mýzykasy» fakýltetiniń dekany, professor T. Toǵjanov.
“Adyrna” ulttyq portaly
