ايتۋلى اقىن، قازاقستاننىڭ ەڭبەك سىڭىرگەن قايراتكەرىن مەرەيتويىمەن قۇتتىقتاۋعا شىعىستىڭ شىعارماشىلىق ينتەلليگەنتسياسى، وقىرماندارى مەن قوعام وكىلدەرى تۇگەل جينالدى. بۇل مەرەكەلىك شارا وبلىس اكىمدىگىنىڭ قولداۋىمەن ءوتتى.
سالتاناتتى شارا بارىسىندا وسكەمەندەگى ا.پۋشكين اتىنداعى وبلىستىق كىتاپحانادا ۇلىقبەك ەسداۋلەتپەن كەزدەسۋ ءوتتى. وندا كەلۋشىلەر قازاقستان جازۋشىلار وداعىنىڭ توراعاسى، «قۇرمەت» وردەنىنىڭ يەگەرى، «قازاقستاننىڭ ەڭبەك سىڭىرگەن قايراتكەرى» ۇلىقبەك ەسداۋلەتتىڭ شىعارماشىلىعىنان سىر شەرتەتىن كىتاپ كورمەسىن تاماشالادى. كورمەدە وقىرمانداردىڭ نازارىنا اقىننىڭ «جۇلدىز جارىعى»، «التايدىڭ التىن تامىرى»، «ۇلىستىڭ ۇلى كۇنى»، «اق كەرۋەن»، «جاراتىلىس»، «جۋرەكتەگى جارىلىستار»، «زامان-اي»، «كيىز كىتاپ»، «قارا پيما» جانە «ىنتىق زار» اتتى كىتاپتارى قويىلدى.
كەزدەسۋدى قازاقستان جازۋشىلار وداعى وبلىستىق فيليالىنىڭ ديرەكتورى، بەلگىلى قالامگەر الىبەك قاڭتارباەۆ جۇرگىزىپ وتىردى. ول مەرەيتوي يەسىنىڭ ءومىر جولىنا، شىعارماشىلىعىنا توقتالىپ ءوتتى. بۇدان سوڭ جاس اقىندار مەن زيالى قاۋىم اقىننىڭ ولەڭدەرىن مانەرلەپ وقىپ، انتيادرولىق قوزعالىستىڭ ءانۇرانىنا اينالعان «زامان-اي» ءانىن بىرگە شىرقادى. باسقوسۋ بارىسىندا ۇ. ەسداۋلەت قازاقستان جازۋشىلار وداعىنداعى جۇمىس بارىسى مەن بولاشاقتاعى شىعارماشىلىق جوسپارلارىمەن ءبولىستى.
كەزدەسۋدە اقىنعا كۇتپەگەن توسىن سىي رەتىندە قازاقستاننىڭ حالىق ءارتىسى روزا رىمباەۆانىڭ بەينەقۇتتىقتاۋى كورسەتىلدى. بەينەقۇتتىقتاۋدا حالىق ءارتىسى ۇ. ەسداۋلەتتىڭ «نەۆادا-سەمەي» حالىقارالىق انتيادرولىق قوزعالىسقا قوسقان ۇلەس زور ەكەنىن اتاپ ءوتتى.
كەزدەسۋ سوڭى وبلىستىق دراما تەاتردا وتكەن «التىن ۇيام – التايىم» اتتى شىعارماشىلىق كەشپەن جالعاستى. سالتاناتتى شاراعا قاتىسقان وبلىس اكىمىنىڭ ورىنباسارى اسەم ءنۇسىپوۆا ۇلىقبەك اعاعا جىلى لەبىزىن ارناپ، اقىننىڭ وڭىرمىزدەگى جانە ەلىمىزدەگى مادەني مۇرانىڭ دامۋىنا قوسىپ جاتقان ۇلەسى زور ەكەنىن اتاپ ءوتىپ، وبلىس اكىمى دانيال احمەتوۆتىڭ قۇتتىقتاۋىن جەتكىزدى.
شىعارماشىلىق كەشتى تاماشالاۋعا جيىلعان كورەرمەن قاۋىمنىڭ نازارىنا تالانتتى جەرلەستەرىنىڭ ومىرىنەن سىر شەرتەتىن بەينەسيۋجەت ۇسىنىلدى. بۇدان سوڭ شىعىس قازاقستانداعى تانىمال انشىلەر مەن ۆوكالدىق توپتار ۇلىقبەك ەسداۋلەتتىڭ اندەرىن ورىنداپ، كورەرمەندەردىڭ قوشەمەتىنە بولەندى. ال مەرەيتوي يەسىنىڭ ونەردەگى ءىنىسى اقبەرەن ەلگەزەك ۇلىقبەك ەسداۋلەتتىڭ كوپتەگەن قازاقستاندىق قايراتكەرلەرگە ۇلگى ەكەنىن اتاپ ءوتتى.
– ول قازاقستان جازۋشىلار وداعىنا باسشىلىققا كەلمەي تۇرىپ-اق، پوەزيانىڭ گەنەرالىنا اينالىپ ۇلگەردى. پوەزيادا ۇستاز بولمايدى دەيدى. الايدا ول ءبىزدىڭ باعىت بەرەر باعدارشامامىز سياقتى. قازىر ءبىز ۇلىقبەك ەسداۋلەتتەي بولۋعا تالپىنامىز، - دەدى اقبەرەن ەلگەزەك.
سالتاناتتى شارا بارىسىندا مەرەيتوي يەسىن وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ازامات مۇحامەدچينوۆ، وبلىستىق سپورت، مادەنيەت قىزمەتكەرلەرى كاسىپوداعىنىڭ توراعاسى ءتۇسىپحان تۇسىپبەكوۆا، ايتۋلى قازاقستاندىق اقىن تىنىشتىقبەك ابدىكاكىمۇلى مەن ەلىمىزدىڭ مادەنيەت قايراتكەرى ايمۇحانبەت بەيسەمبەكوۆ، كاسىپكەر ءارى مەتسەنات قايرات مۋسين قۇتتىقتاپ، اق تىلەكتەرىن ايتتى. ارتىنشا شىعىس قازاقستاننىڭ كاسىپكەرلەرى بىرلەسىپ، مەرەيتوي يەسىنە تەمىر تۇلپار مىنگىزدى.
"ادىرنا" ۇلتتىق پورتالى
