بۇگىن ءماجىلىس توراعاسى ەرلان قوشانوۆ جۋرناليستەردىڭ سۇراقتارىنا جاۋاپ بەردى، دەپ حابارلايدى "ادىرنا" ۇلتتىق پورتالى.
جۋرناليستەر ەرلان جاقانۇلىنا «ناۋرىزدىڭ 5-ءى كۇنى ءسىز جانە ۇكىمەت باسشىسى ولجاس بەكتەنوۆ جۇمىس ساپارىمەن ماسكەۋگە باردىڭىزدار. ءبىزدىڭ قوعامدا «شەنەۋنىكتەر رەسەيگە نەگە بارعىشتاي بەرەدى؟ دەگەن الاڭداۋشىلىق بار. رەسەيگە نەگە پرەمەرمەن ءبىر ۋاقىتتا باردىڭىز؟» دەپ سۇراق قويدى.
«بۇل ادەيى ۇيىمداستىرىلعان نارسە ەمەس. بۇل ۇكىمەتتەر اراسىنداعى وزدەرىنىڭ تالقىلايتىن ماسەلەلەرى بار. ال مەنىڭ بارعان ساپارىم - كوپتەن جوسپارلانعان رەسمي ساپار. ساپار بارىسىندا رەسەي دۋماسىنىڭ باسشىسى ارىپتەسىم ۆولودينمەن جانە فەدەراتسيا كەڭەسىنىڭ ءتورايىمى ماتۆيەنكو حانىممەن كەزدەسۋ بولدى. كوپتەگەن زاڭ شىعارۋ جۇمىسى بويىنشا، باسقا دا مەملەكەت اراسىنداعى قارىم-قاتىناس ماسەلەلەرى بويىنشا كەلىسسوزدەر جۇرگىزىلدى. سونىڭ ىشىندە بىرنەشە ماسەلەنى ايتىپ كەتۋگە بولادى. ول – ءبىزدىڭ جۇرگىزۋشىلەرىمىزدىڭ، جۇك تاسۋشىلارىمىزدىڭ رەسەي مەن بەلارۋس شەكاراسىندا، قازاقستان مەن رەسەي شەكاراداعى جۇك تاسۋ ماسەلەلەرى. سونىمەن قاتار، رەسەيدە اسكەري وقۋ ورىندارىندا وقىپ جاتقان قازاقستاندىق ستۋدەنتتەرىمىزدىڭ ماسەلەلەرى قاراستىرىلدى»، – دەدى ءماجىلىس توراعاسى.
سونداي-اق جۋرناليستەر «دۋما توراعاسى ۆولودينمەن كەزدەسكەن كەزدە دەپۋتاتتاردىڭ قازاقستانعا قارسى پىكىر بىلدىرگەنىن ەسكەرتتىڭىز بە؟” دەپ سۇرادى.
«ءيا، بۇل تاقىرىپتا ءبىز دە اڭگىمەلەستىك. وسى تاقىرىپ توڭىرەگىندە فەدەراتسيا كەڭەسىنىڭ باسشىسى ۆالەنتينا ماتۆيەنكومەن دە سۇحباتتاسقان ەدىك. الداعى ۋاقىتتا ءبىز بۇل ماسەلە بويىنشا ءوزارا جۇمىس جاسايتىن بولىپ كەلىستىك»، – دەدى ول.
بەلگىلى بولعانىنداي 22 اقپان كۇنى مەملەكەت باسشىسى قاسىم-جومارت توقاەۆ تا رەسەيگە بارعان. پرەزيدەنت سوندا بىرنەشە پرەزيدەنتپەن بىرگە «بولاشاقتىڭ ويىندارى» حالىقارالىق ءتۋرنيرىنىڭ اشىلۋ راسىمىنە قاتىسقان.
نازەركە ساندىبەكقىزى
