ەلىمىزدە ءساۋىر ايىنان باستاپ 240 مىڭ وتباسىعا بەرىلە باستاعان اتاۋلى الەۋمەتتىك كومەكتى 2000-نان استام ادام زاڭسىز الىپ كەلگەن. ءتىپتى ولاردىڭ اراسىندا بۇل قاراجاتقا قول جەتكىزۋ ءۇشىن جالعان قۇجات جاساتقاندار دا بار. ال ەڭ سوراقاسى، ولارعا كەيبىر شەنەۋنىكتەردىڭ قولعابىس ەتكەنى بەلگىلى بولدى، دەپ حابارلايدى Almaty.tv تىلشىسى.
بۇگىن ۇكىمەتتە وسىنداي مالىمدەمە جاساعان پرەمەر-ءمينيستردىڭ ورىنباسارى گۇلشارا ابدىقالىقوۆا تەكسەرىس كەزىندە ارنايى كوميسسيا قۇجات جۇزىندە جاعدايى تومەن دەگەن ازاماتتاردىڭ ءزاۋلىم ءۇي، قىمبات كولىكتەرىنىڭ تابىلعانىن ايتتى. ەڭبەك جانە حالىقتى الەۋمەتتىك قورعاۋ مينيسترلىگى بارلىق جاعدايدى قۇقىق قورعاۋ ورگاندارىنا تاپسىرىپتى. زاڭ بۇزعاندار ۇكىمەتتەن العان قارجىسىن تولىق قايتارۋى ءتيىس.
«بۇگىندە اتاۋلى الەۋمەتتىك كومەكتى 240 مىڭ وتباسى نەمەسە 1 ميلليون 400 مىڭ ادام الادى. ءبىز سولاردىڭ اراسىنان جالعان قۇجات جاساتىپ، زاڭسىز تاعايىنداعانداردى انىقتادىق. وكىنىشكە قاراي، جاقسى مۇمكىندىكتى باس پايداسىنا تارتقاندار كوپ. سوندىقتان كەيبىرى ءوز تابىسىن قولدان ازايتىپ، كەيبىرەۋلەر ءتىپتى قۇجات جۇزىندە اجىراسىپ تا كەتكەن», – دەدى قر پرەمەر-ءمينيسترىنىڭ ورىنباسارى گۇلشارا ابدىقالىقوۆا.
سونىمەن قاتار، نۇر-سۇلتانداعى جەڭىل رەلستى كولىك جوباسى كەلەسى جىلدىڭ سوڭىنا دەيىن اياقتالادى. 2020 جىلى تاپسىرىلۋى كەرەك قۇرىلىسى ءارى قاراي جالعاستىرۋعا 1,5 ميلليارد اقش دوللارى جەتپەي، جارتى جولدا توقتاپ قالدى.
ايتا كەتسەك، قۇردىمعا كەتكەن «استانا بانكى» ەسەپشوتىندا جەڭىل رەلستى كولىك جوباسىنىڭ 80 ميلليارد تەڭگەسى ءالى قايتارىلماعان.
«نۇر-سۇلتان قالاسىندا جەڭىل رەلستى كولىك جوباسىن بۇگىندە ەلوردا اكىمدىگى «پروبلەمالى كرەديتتەر قورى» اكتسيونەرلىك قوعامى، ۇلتتىق بانك جانە قارجى مينيسترلىگى قاراستىرۋدا. جوبانى ودان ءارى ىسكە اسىرۋ ماسەلەسى 24 شىلدە كۇنى نۇر-سۇلتان قالاسىن دامىتۋ جونىندەگى مەملەكەتتىك كوميسسيانىڭ وتىرىسىندا قارالاتىن بولادى», – دەدى قر پرەمەر-ءمينيسترىنىڭ ورىنباسارى جەڭىس قاسىمبەك.
جيىندا اۋىل شارۋاشىلىعى جەرلەرىن ساتۋ جانە جالعا بەرۋ بويىنشا موراتوري ماسەلەسى قوزعالدى. جەڭىس قاسىمبەك جاۋاپتى مينيسترلىكتە وسى سۇراققا قاتىستى زاڭ جوباسىنىڭ تۇجىرىمداماسى تانىستىرىلعانىن ايتتى. الداعى ۋاقىتتا بۇل قۇجات قوعاممەن تالقىلاۋ ءۇشىن وڭىرلەرگە جىبەرىلەدى. ال جىل سوڭىندا پرەزيدەنت جانىنداعى ۇلتتىق قوعامدىق سەنىم كەڭەسىنە ۇسىنىلماق.
"ادىرنا" ۇلتتىق پورتالى
