قازاقستاندىق رەجيسسەر دانيار سالاماتتىڭ «تالاق» ءفيلمى شانحاي حالىقارالىق كينوفەستيۆالىندە «ۇزدىك فيلم» اتاندى. قۋانىشتى حاباردى جۋرناليست اينۇر مۇراتوۆا جەتكىزدى، دەپ حابارلايدى «ادىرنا» ءتىلشىسى.
«ءسۇيىنشى! «التىن كۋبوك» بىزدە!»— دەپ جازدى ول.
ايتا كەتەيىك، فەستيۆال ماۋسىم ايىنىڭ 14-23 ارالىعىندا ءوتتى. وعان فرانتسيا، ارگەنتينا، يسپانيا، گەرمانيا، يران، قىتاي سەكىلدى ەلدەردىڭ تۋىندىلارى دا ۇسىنىلدى.
22 ماۋسىمدا شانحايدا 26-شى حالىقارالىق شانحاي كينوفەستيۆالىنىڭ (SIFF) «التىن كۋبوگىمەن» ماراپاتتاۋ ءراسىمى ءوتتى.
ناتيجەسىندە «ۇزدىك فيلم» نوميناتسياسىن قازاقستاندىق «تالاق» ءفيلمى جەڭىپ السا، وسى كينودا باستى ءرولدى سومداعان اميرا وماروۆا ۇزدىك اكتريسا دەپ تانىلدى.
قازينفورمنىڭ حابارلاۋىنشا، 2024 جىلعى كينوفەستيۆالدىڭ نەگىزگى كونكۋرستىق باعدارلاماسىنا ەكى قازاقستاندىق فيلم كىردى: تولىقمەتراجدى كوركەم فيلمدەر بولىمىنە رەجيسسەر دانيار سالاماتتىڭ «تالاق» ءفيلمى تاڭدالدى. ءفيلمنىڭ شانحاي كينوفەستيۆالىندە الەمدىك پرەمەراسى بولدى.
«جاڭا ازيا تالانتتارى» باعدارلاماسىندا قازاقستان، رەسەي جانە يتاليا بىرلەسىپ تۇسىرگەن ماليكا ماحامەدجاننىڭ «ءبىر كۇننەن دە كوپ» اتتى تاعى ءبىر ءفيلمى كورسەتىلدى. ول سونىمەن قاتار الەمدىك پرەمەراعا اينالدى.
بايقاۋعا 105 ەل مەن ايماقتان 3,7 مىڭنان استام ءوتىنىم ءتۇستى. ىرىكتەۋ پروتسەسىنىڭ قورىتىندىسى بويىنشا 29 ەل مەن ايماقتان 50 فيلم بەس نوميناتسيا بويىنشا «التىن كۋبوك» جۇلدەسىن الۋ ءۇشىن تاڭدالدى، ونىڭ 38-ءى الەمدىك پرەمەرا بولدى.
«تولىق مەتراجدى كوركەم فيلمدەر» اتالىمى بويىنشا باس جۇلدەگە 14 فيلم، ونىڭ ىشىندە قازاقستاندىق «تالاق» ءفيلمى دە باق سىنادى.
شانحاي حالىقارالىق كينوفەستيۆالى 1993 جىلدان بەرى وتكىزىلىپ كەلەدى.
بۇعان دەيىن بەيىمبەت ءمايليننىڭ شىعارمالارى جەلىسىمەن تۇسىرىلگەن «تالاق» ءفيلمى شانحاي كينوفەستيۆالىندە كورسەتىلەتىنىن جازعان ەدىك. تۋىندى مادەنيەت جانە اقپارات مينيسترلىگىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ دەمەۋىمەن جارىق كوردى.
