Zhangjiang عىلىمي-تەحنولوگيالىق پاركىندە ورتالىق ەۋرازيا ەلدەرىنىڭ تەحنولوگيالىق الەۋەتىن الەمدەگى ەكىنشى ەكونوميكا – قىتاي ەكوجۇيەسىمەن ينتەگراتسيالاۋعا باعىتتالعان العاشقى مامانداندىرىلعان پلاتفورما – «حان ءتاڭىرى» يننوۆاتسيالىق حابى (Khan Tengri Innovation Hub) رەسمي تۇردە اشىلدى.
بۇل باستاما قازاقستاندىق Growth Vision Pro كومپانياسى تاراپىنان كوتەرىلىپ، قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ، سونداي-اق وڭىردەگى جەتەكشى تەحنوپاركتەر – Astana Hub (قازاقستان) پەن IT Park Uzbekistan-نىڭ قولداۋىمەن جۇزەگە اسىرىلدى.
Khan Tengri Innovation Hub – جاڭا بۋىنداعى تەحنولوگيالىق ديپلوماتيا الاڭى رەتىندە قۇرىلىپ وتىر. ول ورتالىق ەۋرازيانىڭ ستارتاپتارى، يننوۆاتسيالىق كومپانيالارىن جانە R&D ورتالىقتارىن قىتاي نارىعىمەن، سونداي-اق ونىڭ جاھاندىق مۇمكىندىكتەرىمەن بايلانىستىرۋدى كوزدەيدى. بۇل باستاما وڭىرلەر اراسىنداعى ورنىقتى تەحنولوگيالىق ارىپتەستىككە دەگەن ءوسىپ كەلە جاتقان قاجەتتىلىكتى كورسەتەدى.
«Khan-Tengri Innovation Hub وڭىردەگى ستارتاپتار مەن كاسىپكەرلەر ءۇشىن قىتايلىق ينۆەستورلارمەن بايلانىستىراتىن كوپىرگە اينالىپ، ينكۋباتسيالىق جانە اكسەلەراتسيالىق باعدارلامالارعا جول اشادى. ءبىز بۇل حاب ەلىمىزدىڭ تەحنولوگيالىق كومپانيالارى ونىمدەرىن قىتاي نارىعىنا ىلگەرىلەتۋدە ماڭىزدى ءرول اتقارادى دەپ سەنەمىز»، – دەپ اتاپ ءوتتى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
حابتىڭ نەگىزگى ماقساتتارى:
1. تسيفرلاندىرۋ، جوعارى تەحنولوگيالار جانە R&D سالالارىندا ترانسشەكارالىق تەحنولوگيالار ترانسفەرىن دامىتۋ;
2. ورتالىق ازيانىڭ ءىت-كومپانيالارى مەن ستارتاپتارىنا قىتاي نارىعىنا شىعۋىنا قولداۋ كورسەتۋ;
3. قىتاي تەحنولوگيالىق كومپانيالارىنىڭ ەۋرازيا مەن ودان ارى ەۋروپا جانە MENA نارىعىنا «ورتا ءدالىز» ارقىلى «جۇمساق ەنۋىن» قامتاماسىز ەتۋ;
4. بىرلەسكەن R&D-جوبالارىن، تەحنولوگيالار ترانسفەرىن جانە ۆەنچۋرلىك كاپيتال تارتۋدى جۇزەگە اسىرۋ;
5. قىتايدا ورتالىق ەۋرازيا ەلدەرىنىڭ تانىمالدىلىعىن ارتتىرۋ.
«حان ءتاڭىرى» يننوۆاتسيالىق حابى – قازاقستان مەن ورتالىق ازيا كومپانيالارىنىڭ قىتايدا ءوز بيزنەسىن سەنىمدى تۇردە باستاۋىنا جانە دامىتۋىنا ارنالعان الاڭ. بۇل – الەمدەگى ەڭ كۇردەلى ءارى باسەكەگە قابىلەتتى نارىققا شىعۋ ءۇشىن نەگىزگى كەدەرگىلەردى جويۋعا باعىتتالعان باستاما. حابتىڭ باستى ماقساتى – ەۋرازيالىق ستارتاپتار مەن ءىت-كومپانيالار ءۇشىن جاھاندىق مۇمكىندىكتەرگە جول اشۋ.
Khan Tengri Innovation Hub-تا قاتىسۋشىلارعا قىتايدىڭ الدىڭعى قاتارلى تەحنولوگيالىق پاركتەرىنىڭ بىرىندە جۇمىس ىستەۋ جانە ءومىر ءسۇرۋ ءۇشىن بارلىق جاعداي جاسالعان. زاماناۋي كەڭسەلەر، كوۆوركينگتەر، سەرۆيس اپارتامەنتتەرى – بۇلاردىڭ بارلىعى تۇرمىستىق جانە ۇيىمداستىرۋ ماسەلەلەرىنە قاراماستان، ءونىمدى تولىق دامىتۋعا مۇمكىندىك بەرەدى.
ەڭ باستىسى – بارلىق كەزەڭدە قولداۋ كورسەتىلەدى: زاڭدىق جانە سالىقتىق كەڭەس بەرۋدەن باستاپ، قىتايلىق ينۆەستورلارمەن، وندىرىستىك سەرىكتەستەرمەن جانە اكسەلەراتورلارمەن بايلانىس ورناتۋعا دەيىن. مۇنداي ءتاسىلدى جاڭا بيزنەس-ورتادا «جۇمساق قونۋ» – soft-landing دەپ اتايدى.
ينفراقۇرىلىمنان بولەك، حاب ءبىلىم بەرۋ جانە اكسەلەراتسيالىق باعدارلامالارعا قول جەتكىزۋدى ۇسىنادى، بۇل كومپانيالارعا قىتايدا تەز بەيىمدەلىپ، ماسشتابتالۋعا مۇمكىندىك بەرەدى. قىتايلىق XNode اكسەلەراتورىمەن بىرلەسىپ ءارتۇرلى دامۋ دەڭگەيىندەگى كومپانيالارعا ارنالعان باعدارلامالار ازىرلەندى. ولاردىڭ قاتارىندا نارىقتى زەرتتەپ، شىعۋ ستراتەگياسىن قۇرۋعا باعىتتالعان قىسقا مەرزىمدى China Market Entry Bootcamp, سونداي-اق كومپانيانى ىسكە قوسىپ، قىتايداعى قاتىسۋدى كەڭەيتۋگە ارنالعان China Launchpad تا بار. قاتىسۋشىلار مەنتورلىق قولداۋ الىپ، ۆوركشوپتارعا قاتىسادى، ىسكەرلىك كەزدەسۋلەر وتكىزىپ، قىتاي تەحنولوگيالىق ەكوجۇيەسىن ءوز ىشىندە زەرتتەپ باستايدى.
Khan Tengri Innovation Hub – الەمدەگى ەڭ ءىرى تۇتىنۋ نارىعىنا جول اشادى، ول ينۆەستيتسيا تارتۋعا، سەرىكتەستەر تابۋعا جانە تەحنولوگيالىق شەشىمدەردى ەكسپورتتاۋعا كومەكتەسەدى. بۇل – كوپتەگەن كومپانيالار ءۇشىن جاھاندىق ويىنشىعا اينالۋعا بەرىلگەن مۇمكىندىك.
