ۋكراينادا ايدوس سادىقوۆقا قاستاندىق جاساعان ەكى كۇدىكتىگە حالىقارالىق ىزدەۋ جاريالاندى

ۋكراينا باس پروكۋراتۋراسى جۋرناليست ايدوس سادىقوۆقا قاستاندىق جاسادى دەپ كۇدىككە ىلىنگەن التاي جاقانباەۆ پەن مەيرام قاراتاەۆقا حالىقارالىق ىزدەۋ جاريالانعانىن مالىمدەدى، دەپ حابارلايدى “ادىرنا” ۇلتتىق پورتالى. 

ۋكراينا باس پروكۋراتۋراسىنىڭ Telegram-داعى رەسمي ارناسىندا حابارلانعانداي، ەكى قازاقستاندىق جۋرناليست ايدوس سادىقوۆتى ولتىرمەك بولدى دەگەن كۇدىككە ىلىنگەن. ولارعا حالىقارالىق ىزدەۋ جاريالاندى. ەكەۋى دە ادامدار توبىنىڭ تاپسىرىسى جانە الدىن الا ءسوز بايلاسۋى بويىنشا قاساقانا كىسى ولتىرۋگە وقتالدى دەپ كۇدىككە ءىلىندى.

"بۇعان دەيىن ەكى ەر ادامنىڭ ۋكراينادا بوسقىن مارتەبەسى بار ءجۋرناليستى ءولتىرۋ بويىنشا ارەكەتتى مۇقيات جوسپارلاعانى انىقتالدى. كۇدىكتىلەر ۋكراينا اۋماعىنا 2 ماۋسىمدا پولشا-ۋكراينا شەكاراسىنان ءوتىپ كەلگەن. كيەۆتە ولار پاتەر جالداپ، كولىك ساتىپ العان. ولار جابىرلەنۋشىنى ءبىراز ۋاقىت زەرتتەپ باقىلاعان.

قىلمىس جاسالعان كۇنى، ياعني 18 ماۋسىمدا كۇدىكتىلەردىڭ ءبىرى جابىرلەنۋشىنىڭ كولىگىنە جاقىنداپ، وق اتقان، ال ونىڭ سىبايلاسى ءۇي ماڭىنداعى جاعدايدى باقىلاعان. كەيىن ولار وقيعا ورنىنان كەتىپ قالعان.

كۇدىكتىلەر قاساقانا كىسى ولتىرۋگە وقتالعان كۇنى ۋكراينا اۋماعىنان شىعىپ، ۋكراينا مەن مولدوۆا شەكاراسىن كەسىپ وتكەن", - دەپ حابارلادى ۋكراينا مەملەكەتتىك پوليتسياسى. كيەۆتىڭ گولوسەەۆ اۋداندىق سوتى سىرتتاي بۇلتارتپاۋ شاراسى بويىنشا قاماۋعا الۋدى تاعايىندادى. تەرگەۋ جالعاسىپ جاتىر. ايتا كەتەيىك، سادىقوۆقا قاستاندىق 18 ماۋسىمدا كيەۆتىڭ شەۆچەنكوۆ اۋدانىندا، جابىرلەنۋشى ايەلىمەن بىرگە تۇراتىن ۇيدەن الىس ەمەس جەردە بولعان. جابىرلەنۋشىنىڭ ۋكراينادا بوسقىن مارتەبەسى بار. بۇعان دەيىن سادىقوۆقا قاستاندىق جاساعان كۇدىكتىلەر قازاقستان ازاماتى ەكەنىن حابارلادىق.