فوتو: 2gis
الماتىداعى رەسپۋبليكالىق فيزيكا-ماتەماتيكا مەكتەبىندە جەدەل ىشەك ينفەكتسياسىن جۇقتىرعاندار سانى ارتتى، دەپ حابارلايدى “ادىرنا”.
اۋرۋ بەلگىلەرىمەن اۋرۋحاناعا جاتقىزىلعان وقۋشىلارىنىڭ سانى 55-كە جەتتى. قالالىق قوعامدىق دەنساۋلىق ساقتاۋ باسقارماسى مالىمەتىنشە، بالالار 12–15 قازان ارالىعىندا الماتى قالالىق بالالار كلينيكالىق ينفەكتسيالىق اۋرۋحاناسىنا جەتكىزىلگەن. قازىر ولارعا قاجەتتى مەديتسينالىق كومەك كورسەتىلىپ، مامانداردىڭ تۇراقتى باقىلاۋىنا الىنعان.
باسقارمانىڭ حابارلاۋىنشا، اۋرۋحاناعا جاتقىزىلعان بالالاردىڭ جاعدايى تۇراقتى. دەرتتىڭ اسقىنۋ بەلگىلەرى بايقالماعان. رەانيماتسيالىق كومەك قاجەت بولعان جاعدايلار تىركەلمەگەن.
وقيعاعا بايلانىستى مەكتەپ 14–16 قازان ارالىعىندا وقۋ پروتسەسىن ۋاقىتشا ونلاين فورماتقا اۋىستىردى. مەكتەپ-ينتەرنات پەن اس بلوگىنىڭ جۇمىسى توقتاتىلدى. سانيتاريالىق-ەپيدەميولوگيالىق قىزمەت ماماندارى عيماراتتاردى تەكسەرىپ، زەرتحانالىق زەرتتەۋلەر جۇرگىزۋ ءۇشىن سىنامالار العان.
سونداي-اق الماتى قالاسىنىڭ پوليتسياسى رفمم وقۋشىلارىنىڭ جاپپاي ۋلانۋ دەرەگى بويىنشا قىلمىستىق ءىس قوزعادى.
ەسكە سالايىق، 14 قازاندا الماتىداعى رفمم-ءنىڭ 50-گە جۋىق وقۋشىسى جەدەل ىشەك ينفەكتسياسىنىڭ بەلگىلەرىمەن اۋرۋحاناعا جاتقىزىلعانى حابارلانعان ەدى.
