ەڭبەكشى اۋدانىنداعى جىبەك جولى - سايرام كوشەلەرى قيىلىسىندا تاعى ءبىر جاڭا گۇلزار اشىلىپ، پايدالانۋعا بەرىلدى. جاڭا الەۋمەتتىك نىسان كاسىپكەرلەر تاراپىنان ىسكە اسىرىلدى. اۋماعى 1,1 گەكتار گۇلزاردا تۇرعىندارعا بارلىق قولايلى جاعداي جاسالعان. قالا اكىمى عابيت سىزدىقبەكوۆ جاڭا گۇلزاردىڭ اشىلۋىنا قاتىسىپ، تۇرعىندارمەن كەزدەستى.
اۋداندا 2022 جىلى «قازاقستان-تۇركيا دوستىعى» ساياباعى تۇرعىندار يگىلىگىنە بەرىلگەن بولاتىن. بيىل تاعى ءبىر جاڭا گۇلزار تۇرعىندارعا قۋانىش سىيلادى.
جاڭا نىسان – BI group كومپانياسىنىڭ قالاعا سىي رەتىندە تارتۋى بولىپ تابىلادى. جۇمىسشىلار قۇرىلىستى 1,5 اي ىشىندە، قالا كۇنىنە وراي اياقتادى.
جاڭا اللەيا BIG TULIP اتاۋىن يەلەنگەن. Tulip تۇركى تىلىندە قىزعالداق دەگەن ماعىنانى بەرەدى. اللەياعا كىرەبەرىستەگى 5 قىزعالداق تۇندە جارقىراپ، قالانىڭ كوركىن ارتىرادى. كومپانيا وكىلى قايرات قۋانىشباەۆتىڭ ايتۋىنشا، قىركۇيەك ايىندا تاعى ءبىر جوبا تاپسىرىلماق.
بۇعان دەيىن زاڭسىز ساۋدا نىساندارى بولعان اۋماق وسىلايشا اباتتانعان ورىنعا اينالدى. قالا اكىمى تۇرعىندارعا قولايلى ورتا قالىپتاستىرۋ جۇمىستارى ودان ءارى جالعاسا بەرەتىنىن ايتتى.
"وزدەرىڭىز بىلەسىزدەر، بۇنداي نىساندارعا بيۋدجەتتەن قارجى ءبولىنىپ جاتقان جوق. ءبارى دە كاسىپكەرلەردىڭ ءوز باستاماسىمەن، سىي رەتىندە سالىنۋدا. وسى ىسكە ۇلەس قوسقان سىزدەرگە دە راقمەت. يگىلىكتەرىڭىزگە پايدالانىڭىزدار. جاقسى ورىندار كوبەيە بەرسىن. ەندى وسى نىساندى وزدەرىڭىز كۇتىپ-ۇستاڭىزدار. جالپى حالىقتىڭ دا تازالىققا دەگەن ساناسى وزگەرۋى كەرەك. قازىر قالادا سۋبۇرقاقتاردىڭ ەسكىرگەن ناسوستارىن اۋىستىرىپ جاتىرمىز. جاقىن ارادا ونى دا ىسكە قوسامىز", – دەدى قالا اكىمى تۇرعىندارمەن كەزدەسۋدە.
ءوز كەزەگىندە قالا تۇرعىندارى دا شاھار باسشىسىنا ريزاشىلىعىن ايتتى. وسىنداي جاڭا گۇلزارلار كوپتەپ اشىلعالى جاستاردىڭ، تۇرعىنداردىڭ دا تازالىققا دەگەن ويى وزگەرە باستاعانىنا جەتكىزدى.
قىزعالداق – قالامىزدىڭ سيمۆولى. Big Tulip اتاۋى ادامداردىڭ نازارىن وسى ادەمى گۇلگە اۋدارۋدى كوزدەيدى.
