Eńbekshi aýdanyndaǵy Jibek joly - Saıram kósheleri qıylysynda taǵy bir jańa gúlzar ashylyp, paıdalanýǵa berildi. Jańa áleýmettik nysan kásipkerler tarapynan iske asyryldy. Aýmaǵy 1,1 gektar gúlzarda turǵyndarǵa barlyq qolaıly jaǵdaı jasalǵan. Qala ákimi Ǵabıt Syzdyqbekov jańa gúlzardyń ashylýyna qatysyp, turǵyndarmen kezdesti.
Aýdanda 2022 jyly «Qazaqstan-Túrkııa dostyǵy» saıabaǵy turǵyndar ıgiligine berilgen bolatyn. Bıyl taǵy bir jańa gúlzar turǵyndarǵa qýanysh syılady.
Jańa nysan – BI group kompanııasynyń qalaǵa syı retinde tartýy bolyp tabylady. Jumysshylar qurylysty 1,5 aı ishinde, qala kúnine oraı aıaqtady.
Jańa alleıa BIG TULIP ataýyn ıelengen. Tulip túrki tilinde qyzǵaldaq degen maǵynany beredi. Alleıaǵa kireberistegi 5 qyzǵaldaq túnde jarqyrap, qalanyń kórkin artyrady. Kompanııa ókili Qaırat Qýanyshbaevtyń aıtýynsha, qyrkúıek aıynda taǵy bir joba tapsyrylmaq.
Buǵan deıin zańsyz saýda nysandary bolǵan aýmaq osylaısha abattanǵan orynǵa aınaldy. Qala ákimi turǵyndarǵa qolaıly orta qalyptastyrý jumystary odan ári jalǵasa beretinin aıtty.
"Ózderińiz bilesizder, bundaı nysandarǵa bıýdjetten qarjy bólinip jatqan joq. Bári de kásipkerlerdiń óz bastamasymen, syı retinde salynýda. Osy iske úles qosqan sizderge de raqmet. Igilikterińizge paıdalanyńyzdar. Jaqsy oryndar kóbeıe bersin. Endi osy nysandy ózderińiz kútip-ustańyzdar. Jalpy halyqtyń da tazalyqqa degen sanasy ózgerýi kerek. Qazir qalada sýburqaqtardyń eskirgen nasostaryn aýystyryp jatyrmyz. Jaqyn arada ony da iske qosamyz", – dedi qala ákimi turǵyndarmen kezdesýde.
Óz kezeginde qala turǵyndary da shahar basshysyna rızashylyǵyn aıtty. Osyndaı jańa gúlzarlar kóptep ashylǵaly jastardyń, turǵyndardyń da tazalyqqa degen oıy ózgere bastaǵanyna jetkizdi.
Qyzǵaldaq – qalamyzdyń sımvoly. Big Tulip ataýy adamdardyń nazaryn osy ádemi gúlge aýdarýdy kózdeıdi.
