مادەنيەتتانۋشى، عالىم، ديپلومات، مەملەكەت جانە قوعام قايراتكەرى، مۇحتار اۋەزوۆتىڭ ۇلى مۇرات اۋەزوۆ ومىردەن ءوتتى. قارالى حاباردى ادەبيەت زەرتتەۋشى عالىم، فيلولوگيا عىلىمىنىڭ كانديداتى ماماي احەتوۆ Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
"التىننىڭ سىنىعى دا - التىن... ۇلىنىڭ تۇياعى، اسىلدىڭ سىنىعى، قازاق مادەنيەتىنىڭ شىراقشىسى مۇرات مۇحتارۇلى دا بەتىن كەلمەسكە قاراي بۇرىپتى. قوش، ابزال اعا، اقىلدى ۇستاز! الدىڭنان جارىلقاسىن!", - دەپ جازدى ول.
اقپاراتتى الماتى قالاسى اكىمدىگىنىڭ مادەنيەت باسقارماسى راستادى.
مۇرات اۋەزوۆ 1943 جىلى 1 قاڭتار كۇنى جامبىل وبلىسىندا مەركە كەنتىندە قازاقتىڭ جازۋشىسى مۇحتار اۋەزوۆ پەن فاتيما عابيتوۆانىڭ وتباسىندا دۇنيەگە كەلدى.
م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى ينستيتۋتىن "قىتاي فيلولوگياسى" ماماندىعى بويىنشا ءبىتىردى.
1970-1976 جىلداردا م.م.اۋەزوۆ "ەستەتيكا كوچەۆيا" ۇجىمدىق مونوگرافياسىن ازىرلەگەن (1975 جىل) فيلوسوفيا جانە قۇقىق ينستيتۋتىنداعى ەستەتيكا توبىنا جەتەكشىلىك ەتتى.
1981-1987 جىلداردا "قازاقفيلم" كينوستۋدياسىندا باس رەداكتور بولىپ قىزمەت اتقاردى.
1988-1990 جىلداردا قازاقستان جازۋشىلار وداعىنىڭ كوركەم اۋدارما جانە ادەبي ءوزارا بايلانىستار جونىندەگى القاسىن باسقاردى.
1990-شى جىلداردىڭ سوڭىندا م.م. اۋەزوۆ قازاقستانداعى "مير" تەلەراديوكومپانياسىنىڭ كوركەمدىك جەتەكشىسى بولدى.
1990 جىلى قازاق كسر جوعارعى كەڭەسىنىڭ حالىق دەپۋتاتى بولىپ سايلانىپ، وندا كەڭەس پرەزيدۋمىنىڭ مۇشەسى، پارلامەنتارالىق بايلانىستار جونىندەگى كوميتەتتىڭ توراعاسى بولدى.
1992 جىلعى جەلتوقساننان قحر-داعى توتەنشە جانە وكىلەتتى ەلشىسى قىزمەتىنە تاعايىندالدى.
1995 جىلى الماتى وبلىسى اكىمدىگىنىڭ اقپارات جانە قوعامدىق كەلىسىم دەپارتامەنتىن باسقاردى.
1999 جىلعى جەلتوقساننان "سوروس-قازاقستان" قورىنىڭ اتقارۋشى ديرەكتورى، 2002 جىلعى شىلدەدەن قوردىڭ پرەزيدەنتى.
2003-2006 جىلدارى قازاقستان رەسپۋبليكاسى ۇلتتىق كىتاپحاناسىنىڭ باس ديرەكتورى قىزمەتىن اتقاردى.
