بەلگىلى اقىن مۇحتار شاحانوۆتىڭ بۇرىنعى زايىبى، عالىم، پەداگوگ روزاليندا اشىربايقىزى شاحانوۆا دۇنيەدەن ءوتتى، دەپ حابارلايدى “ادىرنا” ۇلتتىق پورتالى.
روزاليندا شاحانوۆا – 1951 جىلى 25 تامىز كۇنى پاۆلودار قالاسىندا دۇنيەگە كەلگەن. QyzPU-دىڭ «ورىس ءتىلى مەن ادەبيەتى» ماماندىعىنا ءتۇسىپ، ونى 1974 جىلى تامامداعان. بەس جىلعا جۋىق ورتا مەكتەپتە تاربيەشى جانە ورىس ءتىلى مەن ادەبيەتى مۇعالىمى بولىپ جۇمىس ىستەگەن.
روزاليندا شاحانوۆا 1990 جىلى كانديداتتىق ديسسەرتاتسياسىن تابىستى قورعاپ شىققان. 1993 جىلى «قازاق ءتىلى مەن ادەبيەتى» ماماندىعى بويىنشا ەكىنشى جوعارى ءبىلىم تۋرالى ديپلوم العان. سونىمەن قاتار سول جىلى دوتسەنت عىلىمي اتاعىنا يە بولدى.
1991-2004 جج. ق.ساتباەۆ اتىنداعى قازۇتزۋ قازاق ءتىلى كافەدراسىنىڭ مەڭگەرۋشىسى. 2004-2008 جج. قازاق مەملەكەتتىك قىزدار پەداگوگيكالىق ينستيتۋتىنىڭ (قازىر ۋنيۆەرسيتەت) وقۋ-ادىستەمەلىك جۇمىستارى جونىندەگى پرورەكتور، 2008-2011 جج. اباي اتىنداعى قازۇپۋ پسيحولوگيا جانە پەداگوگيكا فاكۋلتەتىنىڭ دەكانى، 2011-2014 جج. اباي اتىنداعى قازۇپۋ ماگيستراتۋرا جانە دوكتورانتۋرا ينستيتۋتىنىڭ فيلولوگيالىق ماماندىقتار كافەدراسىنىڭ مەڭگەرۋشىسى قىزمەتىن اتقاردى. 2014-2017 جج. جىلدان باستاپ، اباي اتىنداعى قازۇپۋ فيلولوگيا جانە كوپتىلدى ءبىلىم بەرۋ ينستيتۋتىنىڭ پراكتيكالىق تىلدەر كافەدراسىنىڭ مەڭگەرۋشىسى بولدى. 200-دەن استام عىلىمي ەڭبەكتەرى بار. ونىڭ ىشىندە مونوگرافيالار، وقۋلىقتار جانە وقۋ قۇرالدارى.
