Mádenıettanýshy, ǵalym, dıplomat, memleket jáne qoǵam qaıratkeri, Muhtar Áýezovtiń uly Murat Áýezov ómirden ótti. Qaraly habardy ádebıet zertteýshi ǵalym, fılologııa ǵylymynyń kandıdaty Mamaı Ahetov Facebook paraqshasynda jazdy, dep habarlaıdy “Adyrna” ulttyq portaly.
"Altynnyń synyǵy da - altyn... Ulynyń tuıaǵy, asyldyń synyǵy, qazaq mádenıetiniń shyraqshysy Murat Muhtaruly da betin kelmeske qaraı burypty. Qosh, abzal aǵa, aqyldy ustaz! Aldyńnan jarylqasyn!", - dep jazdy ol.
Aqparatty Almaty qalasy ákimdiginiń Mádenıet basqarmasy rastady.
Murat Áýezov 1943 jyly 1 qańtar kúni Jambyl oblysynda Merke kentinde qazaqtyń jazýshysy Muhtar Áýezov pen Fatıma Ǵabıtovanyń otbasynda dúnıege keldi.
M.V. Lomonosov atyndaǵy Máskeý memlekettik ýnıversıtetiniń Shyǵys tilderi ınstıtýtyn "Qytaı fılologııasy" mamandyǵy boıynsha bitirdi.
1970-1976 jyldarda M.M.Áýezov "Estetıka kochevıa" ujymdyq monografııasyn ázirlegen (1975 jyl) fılosofııa jáne quqyq ınstıtýtyndaǵy estetıka tobyna jetekshilik etti.
1981-1987 jyldarda "Qazaqfılm" kınostýdııasynda bas redaktor bolyp qyzmet atqardy.
1988-1990 jyldarda Qazaqstan jazýshylar odaǵynyń kórkem aýdarma jáne ádebı ózara baılanystar jónindegi Alqasyn basqardy.
1990-shy jyldardyń sońynda M.M. Áýezov Qazaqstandaǵy "Mır" teleradıokompanııasynyń kórkemdik jetekshisi boldy.
1990 jyly Qazaq KSR Joǵarǵy Keńesiniń Halyq depýtaty bolyp saılanyp, onda Keńes Prezıdýmynyń múshesi, parlamentaralyq baılanystar jónindegi komıtettiń tóraǵasy boldy.
1992 jylǵy jeltoqsannan QHR-daǵy tótenshe jáne ókiletti elshisi qyzmetine taǵaıyndaldy.
1995 jyly Almaty oblysy ákimdiginiń aqparat jáne qoǵamdyq kelisim departamentin basqardy.
1999 jylǵy jeltoqsannan "Soros-Qazaqstan" qorynyń atqarýshy dırektory, 2002 jylǵy shildeden qordyń prezıdenti.
2003-2006 jyldary Qazaqstan Respýblıkasy Ulttyq kitaphanasynyń bas dırektory qyzmetin atqardy.
