الماتى وبلىسى جامبىل اۋدانىندا ەكى مىڭداي ەسەك باعىپ وتىرعان شارۋاشىلىق بار. اكىمدىكتىڭ مالىمەتىنە سايكەس، شارۋا قوجالىعىندا العاشقى كەزدە مالعا ازىق بولاتىن داقىلداردى ءوسىرۋ جوسپارلانعان، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
«كازاگروماكس» قوجالىعىنىڭ يەسى ماكسيم پوجيگايلوۆ تا بۇل اقپاراتتى راستاپ وتىر. ونىڭ ايتۋىنشا، كاسىپكەر 1400 گا جەردى 2024 جىلدىڭ اقپان ايىندا شەتەلدىك ينۆەستورلاردىڭ كومەگىمەن ساتىپ العان.
سونداي-اق فەرما يەسى شارۋا قوجالىعىندا اگرارلىق ىسپەن قاتار تۇياقتى جانۋارلاردى باعىپ، ولاردى تىرىدەي شەتەلگە ەكسپورتتاۋ جوسپارلانعانىن ايتتى. جەم-ءشوپ ەگىلگەن ەگىستىڭ ەسەبىنەن الىنباق بولعان.
- ەگىستىكپەن قاتار، قىتايعا جانۋارلاردى تىرىدەي ەكسپورتتاۋ جوسپارلاندى. سەبەبى، ءبىزدىڭ سەرىكتەسىمىزدىڭ قۇلجا قالاسىندا فەرماسى بار. ول ءسۇت ساۋمەن اينالىسادى. بۇل ءسۇت ونكولوگيالىق اۋرۋحانالارعا جىبەرىلەدى. سەبەبى، ەسەك سۇتىندە كازەين اقۋىزى كوپ، ول وكپە مەن باۋىردى ەمدەۋگە كومەكتەسەدى. بىراق بۇل ءبىزدىڭ ەلىمىز ءۇشىن جارامايدى. سوندىقتان تەك ەكسپورت جاساۋ جوسپارلاندى، ياعني شاعىن ەكونوميكالىق ورتا قالىپتاستىرعىمىز كەلدى. وسىندا داقىلداردى ەگەمىز. ونى مالعا بەرىپ، كەيىن ەكسپورتقا جىبەرەمىز، - دەدى ماكسيم پوجيگايلوۆ.
اۋدان اكىمدىگىنىڭ مالىمەتىنشە، كاسىپكەر 2024 جىلدىڭ ناۋرىزىندا جەتىسۋ وبلىسىنان جالپى سانى 1405 ەسەكتى ۆەتەرينارلىق انىقتاماسىمەن ساتىپ العان. بۇگىنگى كۇنى شارۋا قوجالىعىنىڭ اۋماعىندا 1700 ەسەك بار جانە ونىڭ 1032-ءسى ۆەتەرينارلىق پۋنكتتە تىركەلگەن.
شارۋا قوجالىعىندا بۇگىنگى كۇنى 4 ادام جۇمىس ىستەيدى. ولاردىڭ ءبىرى – ەركىن قوجابەرگەن. مال باعۋمەن 25 جىلداي اينالىسقان ول بۇل قوجالىققا بيىل قىس كەزىندە كەلگەن.
ونىڭ ايتۋىنشا، ەسەك اسىراۋدىڭ وزىندىك قيىندىعى بار، جىلقى تەكتەس بۇل جانۋاردى قوي نە جىلقى سەكىلدى جازىق دالادا جايا المايسىڭ.
- ەسەكتى ءبىرىنشى رەت باعىپ وتىرمىن. بۇلار جىلقى تەكتەس. بىراق وزگە مال سەكىلدى باستارى بىرىكپەيدى. جايساڭ جان-جاققا كەتىپ قالادى. سول ءۇشىن قاماپ وتىرمىز. سونداي-اق مىنەزدەرى شاتاق. ءبىر-بىرىمەن وتە ءجيى توبەلەسەدى. وزدەرى سۋىقتى كوتەرمەيدى، ال ىستىقتا سۋدى كوپ ىشەدى. بىراق ءبىر جاقسى قاسيەتى – ءشوپ تالعامايدى، – دەپ اتاپ ءوتتى ول.
ماكسيم پوجيگايلوۆ العاشقى جوسپارى وزگەرگەنىمەن، ەسەكتى تىرىدەي قىتايعا ەكسپورتتاۋدى ءالى دە جوسپارلاپ وتىرعانىن ايتادى. ونىڭ ايتۋىنشا، وسى ۋاقىتقا دەيىن ەكسپورت جاسالماعان. الايدا جانۋارلاردىڭ العاشقى تاسىمالى الداعى ايدا ورىندالۋى مۇمكىن.
