الماتى وبلىسىنىڭ بەكبولات اۋىلىندا جول-كولىك وقيعاسى سالدارىنان ەكى قىزدىڭ اناسى قازا تاپتى، دەپ حابارلايدى “ادىرنا” Orda-عا سىلتەپ.
مارقۇم ەلەكتر ۆەلوسيپەدىمەن جۇمىسقا بارا جاتقان.
مارقۇمنىڭ ۇلكەن قىزى ارۋجاننىڭ ايتۋىنشا، اناسى بەكبولات اۋىلىنداعى پەرۆوماي اۋرۋحاناسىنا جۇمىسقا بارا جاتقان كەزدە قارسى باعىتتان Hyundai كولىگى شىققان.
تۋىستارىنىڭ ايتۋىنشا، كولىك جۇرگىزۋشىسى دەر كەزىندە توقتاي الماي، ايەلدى شامامەن 3-4 مەترگە سۇيرەپ كەتكەن. جول اپاتىنان ول اۋىر باس-مي جاراقاتىن الىپ، III دارەجەلى كوماعا تۇسكەن. الايدا دارىگەرلەر ونىڭ ءومىرىن ساقتاپ قالا المادى.
كۋاگەرلەردىڭ سوزىنشە، وقيعا كەزىندە كولىكتىڭ ىشىندە ءسابي بولعان. مارقۇمنىڭ جاقىندارى جۇرگىزۋشى بالاعا الاڭداپ، جولعا نازار اۋدارماي قالعان بولۋى مۇمكىن دەپ بولجاپ وتىر.
مارقۇمنىڭ تۋىستارىنىڭ ايتۋىنشا، پوليتسيا وقيعا ورنىندا جول اپاتىنىڭ سحەماسىن جاساعان. الايدا ولار سحەما بارىسىندا قاتەلىكتەر جىبەرىلۋى مۇمكىن دەپ ەسەپتەيدى. بۇل جايت ۆيدەودا دا كورسەتىلگەن.
تۋىستارىنىڭ سوزىنشە، Hyundai جۇرگىزۋشىسى وسى ۋاقىتقا دەيىن قازا تاپقان ايەلدىڭ جاقىندارىمەن بايلانىسقا شىقپاعان.
مارقۇمنىڭ ارتىندا ەكى كىشكەنتاي قىزى قالدى. قازىر ولاردىڭ تۋىستارى ءىستىڭ جان-جاقتى ءارى وبەكتيۆتى تەرگەلۋىن تالاپ ەتىپ وتىر.
