Qazaqstanda kassasiialyq sottar qūrylady. Būl turaly Mäjılıs deputaty Abzal Qūspan aitty, dep habarlaidy “Adyrna” ūlttyq portaly.
Bügın, 14 mausym Parlament palatalarynyŋ bırlesken otyrysynda deputattar «Qazaqstan Respublikasynyŋ sot jüiesı men sudialarynyŋ märtebesı turaly» Qazaqstan Respublikasynyŋ Konstitusiialyq zaŋyna özgerıster men tolyqtyrular engızu turaly» QR Konstitusiialyq zaŋynyŋ jobasyn bırınşı oqylymda maqūldady.
«Zaŋ jobasy bırınşı oqylymnan şyqty, ekınşı oqylymǧa deiın tolyqtyrular men özgertuler boluy mümkın. Eŋ basty jaŋalyq – kassasiialyq sottardyŋ qūryluy. Būl mäselenı zaŋgerler qauymy būrynnan köterıp keledı. Osy kezge deiıngı tärtıp qalai edı? Joǧarǧy sot bır sudia qūramymen mäselenı kassasiialyq alqaǧa bere me, bermei me, özı şeşetın. Sony joidyq. Prezident te būl jaiynda aitqan bolatyn. Memleket basşysynyŋ tapsyrmasyna säikes, kassasiialyq sottar öz aldyna bölek qūrylyp jatyr», - dedı ol.
Sonymen qatar mäjılısmen deputattardyŋ qazırgı jaǧdaiyna toqtaldy.
«Jalpy, sudialardyŋ jaǧdaiy sız ben bız oilaǧandai mäz emes. Olardyŋ jalaqysy bır kezderı jaqsy köterılıp edı. Keiın infliasiia saldarynan azaidy. Sonymen qatar olardyŋ materialdyq-tehnikalyq, kölıkpen, üimen qamtamasyz etılu mäselesı şeşılmei jatyr. Jalaqylary eŋ alǧaş sudia bolǧan kezde 300 myŋ teŋge ne oǧan da jetpeidı dep oilaimyn. Alys audandarǧa eşkımnıŋ barǧysy kelmeidı. Jauapkerşılık te joǧary», - dedı Abzal Qūspan.
Ūqsas jaŋalyqtar
