الماتى قالالىق سوتىندا گۇلميرا ساتىبالدىعا قاتىستى باستى سوت وتىرىسى جالعاسىپ جاتىر. بۇگىن، 13 ماۋسىمدا جابىرلەنۋشى كاسىپكەر اباي جۇنىسوۆتەن جاۋاپ الۋ كەزىندە ايىپتالۋشى كۇتپەگەن جەردەن ءوز سۇراعىن قويدى، دەپ حابارلايدى «ادىرنا» ءتىلشىسى.
«ول ء(جۇنىسوۆ — رەد.) مەنى نازارباەۆتىڭ بۇرىنعى كەلىنى دەپ بارلىق جەردە جار سالادى. نە سەبەپتى ءوزىنىڭ مەنىڭ بۇرىنعى كۇيەۋ بالام ەكەنىن ايتپايدى؟ مەنىڭ باستاماممەن ۇستىنەن ءىس قوزعالعانىن ايتادى. سونشالىقتى كۇشتى، قاۋقارلى بولسام، نەگە ولار جابىلىپ قالدى؟»،—دەدى ساتىبالدى.
سۋديا سوتتالۋشىعا ساۋالىن زاڭ تۇرعىسىندا ءتۇسىندىرۋ كەرەكتىگىن ايتتى. ساتىبالدىنىڭ ادۆوكاتى جابىرلەنۋشىنىڭ مىندەتتەرىنە قاتىستى ىستەر نەگە جابىلعانى تۋرالى سۇراقتى قايتا ءتۇسىندىردى.
«كۇيەۋ بالا ەكەنىمدى جاسىرمايمىن. ءسىز قايرات ساتىبالدى سىندى كىسىلەردىڭ ىقپالىنا سۇيەنىپ، جالعىز ارەكەت ەتتىڭىز. ءىس مەنىڭ كىنام دالەلدەنبەگەندىكتەن توقتاتىلدى»،—دەپ جاۋاپ بەردى ءجۇنىسوۆ.
سۋديا جابىرلەنۋشىدەن ۆتب بانكى الدىنداعى قارىزعا قاتىستى جاعدايدى ءتۇسىندىرۋدى سۇرادى.
«قازىر ماسكەۋدەگى مەششانسكي سوتىنىڭ شەشىمى بويىنشا ۆتب بانكى الدىنداعى بورىشكەرمىن. شوتتارىم بۇعاتتالعان، جەكە سوت ورىنداۋشىسىنىڭ وكىلى مەنەن مۇلىكتى ءوندىرىپ الۋ ءۇشىن جۇمىس ىستەپ جاتىر»،— دەدى اباي ءجۇنىسوۆ.
ونىڭ ادۆوكاتى راشيد تەڭەسباەۆ سىبايلاس جەمقورلىققا قارسى قىزمەت ساتىبالدىمەن بىرگە يەلىك ەتكەن كومپانيا سالعان «ۆوستوچكا» تۇرعىن ءۇي كەشەنىنىڭ قۇرىلىسىنا قاتىستى جەكە قىلمىستىق ءىستى تەرگەپ جاتقانىن اتاپ ءوتتى. بۇل دەرەك بويىنشا قىلمىستىق كودەكستىڭ 190-بابى 4-بولىگىنىڭ 2-تارماعى بويىنشا ءىس قوزعالعان. ايتۋىنشا، زاڭسىز ارەكەتتەرگە «Nurbank»، الماتى اكىمدىگىندەگى جانە «Samruk-Kazyna construction» اق-نىڭ لاۋازىمدى تۇلعالارى ارالاسىپ وتىر.
سوت جۇنىسوۆتەن 7,8 ملرد تەڭگە ءوندىرۋ تۋرالى شەشىم قابىلدادى. بىراق كەشىكتىرۋلەر مەن ايىپپۇلدار ەسەبىنەن سوما ەكى ەسە ءوستى.
ەسكە سالايىق، 3 ماۋسىمدا قايرات ساتىبالدىنىڭ بۇرىنعى ايەلى گۇلميرا ساتىبالدىنىڭ ءىسى بويىنشا باستى سوت وتىرىسى باستالدى. ول كەلەسىدەي قىلمىستىق قۇقىق بۇزۋشىلىقتاردى جاساعانى ءۇشىن سوتقا تارتىلادى:
– 126 باپ 3-بولىكتىڭ 3-تارماعى – ابايسىزدا جابىرلەنۋشىنىڭ ولىمىنە نەمەسە وزگە دە اۋىر زارداپتارعا اكەپ سوققان ادام ۇرلاۋ;
– 194 باپ 4-بولىگىنىڭ 2-تارماعى – اسا ءىرى مولشەردە بوپسالاۋ;
– قازاقستان رەسپۋبليكاسى قىلمىستىق كودەكسىنىڭ 389 بابىنىڭ 4-بولىگى - اۋىر زارداپتارعا اكەپ سوقتىرعان وزبىرلىق.
