1999 جىلى قۇرىلعان Almaty TV – ەلىمىزدەگى بۇرىننان كەلە جاتقان تەلەارنالاردىڭ ءبىرى. 200-دەن استام ادام قىزمەت ەتەتىن ۇجىم شيرەك عاسىر بويى وتاندىق مەديايندۋستريانىڭ دامۋىنا وزىندىك ۇلەسىن قوسىپ كەلەدى دەپ حابارلايدى «ادىرنا» ءتىلشىسى Almaty.tv-گە سىلتەمە جاساپ.
سول كەزدەگى ايماقتىق رەسۋرستىڭ العاشقى ەفيرى نەبارى 3-اق ساعات بولعان ەدى. العاشىندا سپەكتاكلدەر، فيلمدەر، سونداي-اق جاڭالىقتار ەكسپەريمەنت رەتىندە تاراتىلدى. كەيىننەن شىعارماشىلىق توپتىڭ كۇش-جىگەرى مەن ەرەن ەڭبەگىنىڭ ارقاسىندا تەلەارنا كورەرمەندەردىڭ كوڭىلىنەن شىعىپ، ىستىق ىقىلاسىنا بولەنە باستادى.
ءوندىرىس بارىسىندا اقپاراتتىق-ساراپتامالىق، مادەني، تانىمدىق جوبالارعا باسىمدىق بەرىلگەن سوڭعى جىلى 10 000-نان استام جاڭالىقتار سيۋجەتى، ارنايى رەپورتاج بەن دەرەكتى فيلم، سونداي-اق 30-دان استام باعدارلاما مەن تەلەحيكايا جارىققا شىقتى.
تەلەارنانىڭ باس ديرەكتورى تيمۋر بازارباەۆتىڭ ايتۋىنشا، Almaty TV 25 جىلدىق مەرەيتويىندا كورەرمەندەرىن ەكى جاڭا ماۋسىمىمەن قۋانتپاق. ولاردىڭ ءبىرى كوكتەمدە كورەرمەنگە جول تارتقان ەدى. كۇزگى ماۋسىمعا تاعى دا بىرنەشە عاجايىپ، رۋحتى شوۋ جانە تەلەارنادا وندىرىلگەن 7 تەلەحيكايا دايىندالىپ جاتىر.
«مەرەيلى جىلى ءبىزدىڭ ۇجىم الەۋمەتتىك جانە قايىرىمدىلىق باعىتىندا 40-قا جۋىق شارا وتكىزبەك. مىسالى، جاڭالىقتار ەفيرىندە «25 قايىرىمدى ءىس» ايدارى، ال digital-پلاتفورمامىزدا بالالارعا ارنالعان «ارمانىڭا جەت» جوباسى جارىققا شىعادى. وسى ءساتتى پايدالانىپ، ءسوز سوڭىندا كورەرمەندەرىمىزگە ريزاشىلىق بىلدىرگىم كەلەدى. سىزدەردىڭ قولداۋلارىڭىزبەن تەلەارنامىز جاڭا جەتىستىكتەرگە جەتە بەرەدى دەپ سەنەمىن», - دەدى تيمۋر بازارباەۆ.
اتاپ ايتارلىق جايت، 2022 جىلدىڭ تامىزىنان باستاپ Almaty TV رەسپۋبليكالىق مارتەبە الىپ، قازاقستان رەسپۋبليكاسىنىڭ بارلىق اۋماعىندا تاراتىلاتىن ارنالار تىزىمىنە ەندى، ال ونىڭ اۋديتوريانى تەحنيكالىق قامتۋى 47 پايىزدان 89 پايىزعا ءوستى.
سول جىلى تەلەارنانىڭ رەبرەندينگى جاسالدى. برەندتىڭ اشىق جاسىل تۇستە جاڭعىرتىلۋى Almaty TV ارناسىنىڭ جاڭا كەزەڭىن - ءداستۇرلى ەفيرلىك جانە تسيفرلىق ينتەرنەت-ورتانىڭ سينەرگياسىن بەينەلەدى. بۇل ورايدا «زاماناۋي كلاسسيكاعا» باسىمدىق بەرىلدى. بۇل تەلەۆيدەنيەنىڭ ەرەسەكتەر اۋديتورياسى مەن الەۋمەتتىك جەلى كونتەنتىن، ستريمينگتىك ونلاين-رەسۋرستاردى قولداناتىن جاس ۇرپاقتىڭ باسىن بىرىكتىرەرى ءسوزسىز.
سالىنعانىنا 7 جىل بولعاندا، ياعني، 2023 جىلى تەلەارنانىڭ باس ستۋديالىق پاۆيلونى جاڭارتىلدى. جاڭعىرتۋ اياسىندا زاماناۋي بەيىمدەلگىش دەكوراتسيالار جاسالىپ، العاش رەت پوليمەرلىك قۇيمالى جابىن پايدالانىلدى. ستۋديانىڭ پايدالى اۋماعى 2 ەسە ۇلكەيتىلدى. الماتى قالاسى اكىمدىگىنىڭ قولداۋىمەن جاڭادان ءتۇسىرۋ جانە مونتاجداۋ قۇرىلعىسى ساتىپ الىندى.
ەفيرلىك ساياساتتى جەتىلدىرۋ شارالارىنىڭ ناتيجەسىندە Almaty TV ارناسىنىڭ تەلەقارالىم كورسەتكىشتەرى تۇراقتى تۇردە جاقسارىپ كەلەدى. «K Research Central Asia» مالىمەتتەرى بويىنشا بىلتىر كورەرمەن سانى 4,2 ملن بولدى. ال مەملەكەتتىك تىلدەگى وزىندىك ءوندىرىس ۇلەسى 83 پايىزعا جەتتى.
جاڭا اقپاراتتىق ستراتەگيانى جۇزەگە اسىرۋ ناتيجەسىندە تەلەارنانىڭ ينتەرنەتتەگى ورنى دا ايتارلىقتاي نىعايدى. سايت كورسەتكىشتەرى 5 ەسە – 9 ملن-نان 45 ملن قارالىمعا دەيىن ارتتى. YouTube جازىلۋشىلارىنىڭ سانى 1,2 ملن-نان استى. جاقىن ۋاقىتتا جاڭارتىلعان ۆەب-سايت پەن ونىڭ موبيلدىك نۇسقاسى دا ۇسىنىلادى.
