1999 jyly qūrylǧan Almaty TV – elımızdegı būrynnan kele jatqan telearnalardyŋ bırı. 200-den astam adam qyzmet etetın ūjym şirek ǧasyr boiy otandyq mediaindustriianyŋ damuyna özındık ülesın qosyp keledı dep habarlaidy «Adyrna» tılşısı Almaty.tv-ge sılteme jasap.
Sol kezdegı aimaqtyq resurstyŋ alǧaşqy efirı nebärı 3-aq saǧat bolǧan edı. Alǧaşynda spektaklder, filmder, sondai-aq jaŋalyqtar eksperiment retınde taratyldy. Keiınnen şyǧarmaşylyq toptyŋ küş-jıgerı men eren eŋbegınıŋ arqasynda telearna körermenderdıŋ köŋılınen şyǧyp, ystyq yqylasyna bölene bastady.
Öndırıs barysynda aqparattyq-saraptamalyq, mädeni, tanymdyq jobalarǧa basymdyq berılgen soŋǧy jyly 10 000-nan astam jaŋalyqtar siujetı, arnaiy reportaj ben derektı film, sondai-aq 30-dan astam baǧdarlama men telehikaia jaryqqa şyqty.
Telearnanyŋ bas direktory Timur Bazarbaevtyŋ aituynşa, Almaty TV 25 jyldyq mereitoiynda körermenderın ekı jaŋa mausymymen quantpaq. Olardyŋ bırı köktemde körermenge jol tartqan edı. Küzgı mausymǧa taǧy da bırneşe ǧajaiyp, ruhty şou jäne telearnada öndırılgen 7 telehikaia daiyndalyp jatyr.
«Mereilı jyly bızdıŋ ūjym äleumettık jäne qaiyrymdylyq baǧytynda 40-qa juyq şara ötkızbek. Mysaly, jaŋalyqtar efirınde «25 qaiyrymdy ıs» aidary, al digital-platformamyzda balalarǧa arnalǧan «Armanyŋa jet» jobasy jaryqqa şyǧady. Osy sättı paidalanyp, söz soŋynda körermenderımızge rizaşylyq bıldırgım keledı. Sızderdıŋ qoldaularyŋyzben telearnamyz jaŋa jetıstıkterge jete beredı dep senemın», - dedı Timur Bazarbaev.
Atap aitarlyq jait, 2022 jyldyŋ tamyzynan bastap Almaty TV respublikalyq märtebe alyp, Qazaqstan Respublikasynyŋ barlyq aumaǧynda taratylatyn arnalar tızımıne endı, al onyŋ auditoriiany tehnikalyq qamtuy 47 paiyzdan 89 paiyzǧa östı.
Sol jyly telearnanyŋ rebrendingı jasaldy. Brendtıŋ aşyq jasyl tüste jaŋǧyrtyluy Almaty TV arnasynyŋ jaŋa kezeŋın - dästürlı efirlık jäne sifrlyq internet-ortanyŋ sinergiiasyn beineledı. Būl oraida «zamanaui klassikaǧa» basymdyq berıldı. Būl televidenienıŋ eresekter auditoriiasy men äleumettık jelı kontentın, strimingtık onlain-resurstardy qoldanatyn jas ūrpaqtyŋ basyn bırıktırerı sözsız.
Salynǧanyna 7 jyl bolǧanda, iaǧni, 2023 jyly telearnanyŋ bas studiialyq pavilony jaŋartyldy. Jaŋǧyrtu aiasynda zamanaui beiımdelgış dekorasiialar jasalyp, alǧaş ret polimerlık qūimaly jabyn paidalanyldy. Studiianyŋ paidaly aumaǧy 2 ese ülkeitıldı. Almaty qalasy äkımdıgınıŋ qoldauymen jaŋadan tüsıru jäne montajdau qūrylǧysy satyp alyndy.
Efirlık saiasatty jetıldıru şaralarynyŋ nätijesınde Almaty TV arnasynyŋ teleqaralym körsetkışterı tūraqty türde jaqsaryp keledı. «K Research Central Asia» mälımetterı boiynşa byltyr körermen sany 4,2 mln boldy. Al memlekettık tıldegı özındık öndırıs ülesı 83 paiyzǧa jettı.
Jaŋa aqparattyq strategiiany jüzege asyru nätijesınde telearnanyŋ internettegı orny da aitarlyqtai nyǧaidy. Sait körsetkışterı 5 ese – 9 mln-nan 45 mln qaralymǧa deiın artty. YouTube jazyluşylarynyŋ sany 1,2 mln-nan asty. Jaqyn uaqytta jaŋartylǧan veb-sait pen onyŋ mobildık nūsqasy da ūsynylady.
