مارقۇم سالتانات نۇكەنوۆانىڭ اعاسى ايتبەك امانگەلدى 24 ساعات ىشىندە ساياساتكەر، قازاقستان حالىقتىق پارتياسىنىڭ توراعاسى ەرمۇحامەت ەرتىسباەۆتان كەشىرىم سۇراۋىن تالاپ ەتتى، دەپ حابارلايدى «ادىرنا» ءتىلشىسى.
«سىزدەر ءۇشىن سەنساتسيا ەمەس شىعار، بىراق ەرتىسباەۆ - وتىرىكشى. ماعان قاتىستى جالعان اقپارات تاراتقانىم ءۇشىن قىلمىستىق ءىس قوزعالعانى تۋرالى مالىمدەمەسىن كورگەن بولارسىزدار.
مەن ءىىم-گە جانە باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ استانا قالاسى بويىنشا دەپارتامەنتىنە سوتقا دەيىنگى تىركەلگەن ماتەريالدار، ماعان قارسى قولدانىستاعى وتىنىشتەر تۋرالى اقپارات بەرۋ تۋرالى سۇراۋ تاستادىم. جالپى بۇل ءىس بويىنشا پروتسەسسۋالدى مارتەبە بار-جوعىن بىلگىم كەلدى. 10 ماۋسىمدا «ارنايى ەسەپكە الۋ» اۆتوماتتاندىرىلعان اقپاراتتىق جۇيەسىنىڭ دەرەكتەرىنە سايكەس ماعان قاتىستى اتالعان سيپاتتاعى اقپارات جوق ەكەندىگى تۋرالى اقپارات الدىم. ەگەر ەرتىسباەۆتىڭ ايتقانى راس بولسا، مەنى كەم دەگەندە جاۋاپ الۋعا شاقىرتار ەدى»،—دەدى ول.
ايتبەك امانگەلدى ەكس-مينيستردەن جالعان اقپارات تاراتقانى ءۇشىن رەسمي تۇردە كەشىرىم سۇراۋىن تالاپ ەتتى.
ەرتىسباەۆتان جالعان دەرەكتى تاراتقانى ءۇشىن جاريا تۇردە ونى تەرىسكە شىعارۋدى جانە كەشىرىم سۇراۋدى تالاپ ەتەمىن. ەگەر ولاي جاساماسا، ونىڭ ءىس-ارەكەتتەرىنە قاتىستى ار-نامىس پەن قادىر-قاسيەتتى قورعاۋ تۋرالى تالاپ ارىز جىبەرىلەدى. سونىمەن قاتار پوليتسياعا قر قك 274-بابى بويىنشا ارىز جازىپ، مورالدىق زياندى وتەۋدى تالاپ ەتەمىن. ەرتىسباەۆتان 24 ساعاتتىڭ ىشىندە جاۋاپ كۇتەمىن»،—دەدى ول.
ەسكە سالايىق، بۇعان دەيىن ەرمۇحامەت ەرتىسباەۆ ايتبەك امانگەلدىنىڭ ۇستىنەن قىلمىستىق ءىس قوزعالعانىن ايتقان ەدى.
