قازاق فۋتبولىنىڭ اڭىز ويىنشىلارىنىڭ ءبىرى نۇربول جۇماسقاليەۆ بۋتسىسىن شەگەگە ىلسە دە، قايتادان فۋتبولعا ورالدى. باپكەر رەتىندە ءوزى تالاي جىل نامىسىن قورعاعان قوستانايلىق "توبىل" تىزگىنىن جۇماسقاليەۆكە سەنىپ تاپسىردى.
"نۇربول جۇماسقاليەۆ باس باپكەر مىندەتىن اتقارۋشى بولىپ تاعايىندالدى. نۇربول جاردەمۇلى كوماندانىڭ ويىنشىلارىمەن جانە قوستاناي فۋتبولىنىڭ تاريحىمەن جاقسى تانىس. كلۋبتىڭ اڭىز ويىنشىسى ەكەنى فۋتبولسۇيەر قاۋىمعا بەلگىلى. بۇعان دەيىن سپورت ديرەكتورى قىزمەتىندە فۋتبول ورتالىعى مەن قوسالقى قۇرامداعى جاس ويىنشىلاردى دايىنداۋ ۇردىستەرىنە جاۋاپ بەردى. ول جەرگىلىكتى جاس فۋتبولشىلاردى نەگىزگى كوماندا قۇرامىنا الۋعا كومەكتەسەدى", - دەپ جازدى قوستاناي كلۋبىنىڭ رەسمي سايتى.
ەستەرىڭىزگە سالا كەتەيىك، ەۋروپا ليگاسىنىڭ ءبىرىنشى كەزەڭىندە "توبىل" ليۋكسەمبۋرگتىڭ "جەنەسس" كومانداسىنان ماسقارا بولىپ ۇشىپ كەتكەن بولاتىن. سونىڭ ناتيجەسىندە باس باپكەرى رەسەيلىك گاززاەۆ وتستاۆكاعا كەتكەن.
"ادىرنا" ۇلتتىق پورتالى
