قازاقستاندا «اتلەتيكو مادريد» فۋتبول اكادەمياسى اشىلادى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
مەملەكەت باسشىسى «اتلەتيكو مادريد» فۋتبول كلۋبىنىڭ پرەزيدەنتى ەنريكە سەرەسو توررەستى قابىلدادى.
پرەزيدەنت قاسىم-جومارت توقاەۆ يسپانيالىق كلۋبتىڭ فۋتبول الەمىندەگى بەدەلى زور ەكەنىن اتاپ، ەنريكە سەرەسو توررەسكە قازاقستاندا اتالمىش سپورتتى دامىتۋعا كوڭىل بولگەنى ءۇشىن العىس ءبىلدىردى.
قاسىم-جومارت توقاەۆ فۋتبولدى دامىتۋعا باعىتتالعان بۇل باستاماعا مەملەكەت جان-جاقتى قولداۋ كورسەتۋگە دايىن ەكەنىن دە ايتتى.
ەنريكە سەرەسو توررەس «اتلەتيكو مادريد» فۋتبول اكادەمياسى الەمنىڭ كوپتەگەن ەلىندە اشىلعانىن جەتكىزدى.
ال ەلىمىزدە كلۋبتىڭ فۋتبول اكادەمياسى الماتى وبلىسى تالعار قالاسىنداعى «Akbulak» وليمپيادا ورتالىعىنىڭ بازاسىندا قۇرىلماق.
جيىن سوڭىندا ەنريكە سەرەسو توررەس پرەزيدەنت قاسىم-جومارت توقاەۆقا «اتلەتيكو مادريد» ويىنشىلارىنىڭ قولتاڭباسى قويىلعان جەيدە سىيلادى.
