شەنەۋنىك سپورتشى شەنەۋنىك اقىندى سوتقا بەرۋدە

4153
Adyrna.kz Telegram

قازاقستانعا تانىمال ايتىسكەر اقىن، ءجۇرسىن ەرماننىڭ "قايقى قىلىشى" اتانعان  باۋىرجان حاليوللانى باتىس قازاقستان وبلىستىق سپورت باسقارماسىنىڭ باسشىسى ءاسيا امانباەۆا سوتقا بەرىپتى. بۇگىندە ورال قالاسىنداعى قادىر مىرزا-ءالى اتىنداعى ونەر ورتالىعىنىڭ باسشىسى بولىپ قىزمەت اتقاراتىن شەنەۋنىك-اقىننىڭ "ايىبى" وبلىستىڭ باس سپورتشىسىنىڭ قىزمەتىنە ءمىن تاعۋى ەكەن. ءاسيا حانىم ءوزىنىڭ ار-نامىسىنا تيگەن باۋىرجان حاليوللانى سوتقا بەرۋ ارقىلى ار-نامىسىن 1 ميلليون تەڭگەگە باعالاپتى. بۇل تۋرالى باۋىرجان حاليوللا ءوز فب پاراقشاسىندا جازدى. ءبىز باۋىرجاننىڭ جازعانىن قاز-قالپىندا بەرىپ وتىرمىز.

ۇندەمەيىن-اق دەپ ەدىم

"بقو نىڭ باس سپورتشىسى مەنى سوتقا بەرىپتى. ار-نامىسىنىڭ قۇنى - 1 ملن تەڭگە ەكەن.
قىسقاشا ايتقاندا مەن ء"وز جۇمىسىن مۇلتىكسىز ورىنداپ جۇرگەن حانىمعا تەككە ء"تيىسىپپىن", ءسويتىپ ابىرويىنا نۇقسان كەلتىرىپپىن"
ءسىرا مەنى ساۋاتسىز، زاڭنان حابارسىز، كولدەنەڭ كوك اتتىلى دەپ ويلاسا كەرەك.
اناۋ-مىناۋ ەمەس، "قىلمىستىق ءىس قوزعاڭىز" دەپ شاعىمدانىپتى.
مەن نە، قىلمىستىق ءىس قوزعايتىنداي جەكە باسىنا "پاراقور، جەمقور، جەزوكشە، قىلمىسكەر" دەپ جالا جاۋىپپىن با؟؟؟
الەۋمەتتىك جەلىدە كاسىبي جۋرناليست رەتىندە بقو سپورتى تۋرالى ءبارىن زەرتتەپ، زەردەلەپ، ناقتى دالەلمەن، دەرەكپەن جازدىم.
سوندا قالاي، بۇل كىسىگە ەشكىم ەشتەڭە دەمەۋ كەرەك پە؟؟؟
ونسىز دا باتىستىڭ سپورتى باتپاققا باتىپ تۇر. سونى جونگە سالۋدىڭ ورنىنا، سالاقۇلاش شاعىم جازىپ، قاعازىن قوبىراتىپ مەنىمەن "شايقاسايىن" دەپ وتىر.
مەن قايتا ءبىراز جاناشىرلاردىڭ وتىنىشىمەن ۇندەمەي كەلدىم، جەڭىل عانا سىناپ جازدىم.
ەندى جازۋدىڭ كوكەسىن كورسەتەمىن!!!
باس سپورتشىدا "ار-نامىس" بار ەكەن دە، جۇمىس بارىسىندا نەشەتۇرلى قۋدالاۋ مەن قىسىم كورگەن سپورتشىلاردا ونداي قۇندىلىق جوق پا؟؟؟؟
ون كۇندەي ءىسساپاردا بولىپ، بۇل تۋرالى ايتاتىن دا ۋاقىتىم بولماپ ەدى.
شاماسى بىرەۋلەردىڭ "اقىلىمەن" نەمەسە ايتاعىمەن مەنى "ۇركىتىپ" تارتىپكە سالعىسى كەلگەن بولار.
سوعىستىڭ كوكەسى الدا، ەندى ءسىزدىڭ قىزمەتكەرلەرىڭىز ماعان ادام سالىپ، "اناعان تيىسپە، مىناعان تيىسپە" دەمەيتىن بولسىن، ءبارىن دۇرىستاپ باستايمىن، ءاسيا حانىم!!!" دەيدى ايتىسكەر اقىن.

سوڭعى كەزدە بقو سپورتىنان قايرات كەتكەنىن سپورتتان حابارى بار ءار جانكۇيەر ايتادى. سپورت ماماندارىن ايتپاعاندا. كەزىندە ورالدىڭ ارىستان جۇرەك، قۇرىش بىلەك جىگىتتەرىنەن ەلىمىزدى قويىپ، الەم پالۋاندارى قورقاتىن. جىمپيتى مەن تايپاق توپىراعى ەل بايراعىن جەلبىرەتكەن قانشاما پالۋان سىيلادى. قونىس جەتپىسوۆ پەن ەربولات بايباتىروۆتار بەلدەسكەننىڭ بەلىن ءۇزىپ، اياعى باردى تىزەرلەتتى. ورالبەك قوجاگەلدين،  اسحات شايحيەۆ، دانيار ەلەۋسىنوۆتەردىڭ اتى قازاق سپورتىنىڭ تاريحىندا التىن ارىپپەن جازۋلى.

وسى باعلاندار مەن وعلانداردىڭ جەڭىستى كۇندەرىنە كۋاگەر باۋىرجان حاليوللا سوڭعى جىلدارداعى سپورت باسقارماسىنىڭ جۇمىستارىن سىناپ بىرنەشە مارتە پوست جازعان بولاتىن. وسى جازبالارى ءاسيا امانباەۆا حانىمنىڭ ابىرويى مەن ار-نامىسىنا نۇقسان كەلتىرىپ، شەنەۋنىك سپورتشى شەنەۋنىك اقىندى سوتقا بەرۋدە.

سوتتىڭ ءبىرىنشى تىڭداۋى بۇگىن ءوتۋى كەرەك بولاتىن. تۇستەن كەيىن سوتقا شاقىرتىلعان اقىن-شەنەۋنىك سوتتىڭ بولماعانىن ايتتى. سەبەپ، ءاسيا امانباەۆا قىزمەتتىك ءىس-ساپاردا ەكەن.

"ادىرنا " ۇلتتىق پورتالى 

پىكىرلەر