Qazaqstanǵa tanymal aıtysker aqyn, Júrsin Ermannyń "Qaıqy qylyshy" atanǵan Baýyrjan Halıollany Batys Qazaqstan oblystyq sport basqarmasynyń basshysy Ásııa Amanbaeva sotqa beripti. Búginde Oral qalasyndaǵy Qadyr Myrza-Áli atyndaǵy óner ortalyǵynyń basshysy bolyp qyzmet atqaratyn sheneýnik-aqynnyń "aıyby" oblystyń bas sportshysynyń qyzmetine min taǵýy eken. Ásııa hanym óziniń ar-namysyna tıgen Baýyrjan Halıollany sotqa berý arqyly ar-namysyn 1 mıllıon teńgege baǵalapty. Bul týraly Baýyrjan Halıolla óz Fb paraqshasynda jazdy. Biz Baýyrjannyń jazǵanyn qaz-qalpynda berip otyrmyz.
ÚNDEMEIIN-AQ DEP EDIM
"BQO nyń bas sportshysy meni sotqa beripti. Ar-namysynyń quny - 1 mln teńge eken.
Qysqasha aıtqanda men "óz jumysyn múltiksiz oryndap júrgen hanymǵa tekke "tıisippin", sóıtip abyroıyna nuqsan keltirippin"
Sirá meni saýatsyz, zańnan habarsyz, kóldeneń kók attyly dep oılasa kerek.
Anaý-mynaý emes, "qylmystyq is qozǵańyz" dep shaǵymdanypty.
Men ne, qylmystyq is qozǵaıtyndaı jeke basyna "paraqor, jemqor, jezókshe, qylmysker" dep jala jaýyppyn ba???
Áleýmettik jelide kásibı jýrnalıst retinde BQO sporty týraly bárin zerttep, zerdelep, naqty dálelmen, derekpen jazdym.
Sonda qalaı, bul kisige eshkim eshteńe demeý kerek pe???
Onsyz da Batystyń sporty batpaqqa batyp tur. Sony jónge salýdyń ornyna, salaqulash shaǵym jazyp, qaǵazyn qobyratyp menimen "shaıqasaıyn" dep otyr.
Men qaıta biraz janashyrlardyń ótinishimen úndemeı keldim, jeńil ǵana synap jazdym.
Endi jazýdyń kókesin kórsetemin!!!
Bas sportshyda "AR-NAMYS" bar eken de, jumys barysynda neshetúrli qýdalaý men qysym kórgen sportshylarda ondaı qundylyq joq pa????
On kúndeı issaparda bolyp, bul týraly aıtatyn da ýaqytym bolmap edi.
Shamasy bireýlerdiń "aqylymen" nemese aıtaǵymen meni "úrkitip" tártipke salǵysy kelgen bolar.
Soǵystyń kókesi alda, endi Sizdiń qyzmetkerlerińiz maǵan adam salyp, "anaǵan tıispe, mynaǵan tıispe" demeıtin bolsyn, bárin durystap bastaımyn, Ásııa hanym!!!" deıdi aıtysker aqyn.
Sońǵy kezde BQO sportynan qaırat ketkenin sporttan habary bar ár jankúıer aıtady. Sport mamandaryn aıtpaǵanda. Kezinde Oraldyń arystan júrek, qurysh bilek jigitterinen elimizdi qoıyp, álem palýandary qorqatyn. Jympıty men Taıpaq topyraǵy el baıraǵyn jelbiretken qanshama palýan syılady. Qonys Jetpisov pen Erbolat Baıbatyrovtar beldeskenniń belin úzip, aıaǵy bardy tizerletti. Oralbek Qojageldın, Ashat Shaıhıev, Danııar Eleýsinovterdiń aty qazaq sportynyń tarıhynda altyn árippen jazýly.
Osy baǵlandar men oǵlandardyń jeńisti kúnderine kýáger Baýyrjan Halıolla sońǵy jyldardaǵy sport basqarmasynyń jumystaryn synap birneshe márte post jazǵan bolatyn. Osy jazbalary Ásııa Amanbaeva hanymnyń abyroıy men ar-namysyna nuqsan keltirip, sheneýnik sportshy sheneýnik aqyndy sotqa berýde.
Sottyń birinshi tyńdaýy búgin ótýi kerek bolatyn. Tústen keıin sotqa shaqyrtylǵan aqyn-sheneýnik sottyń bolmaǵanyn aıtty. Sebep, Ásııa Amanbaeva qyzmettik is-saparda eken.
"Adyrna " ulttyq portaly
