جاستار جىلى اياسىندا وبلىستا جاستار ساياساتىنا ارنالعان ءتورت جاڭا جوبا ىسكە اسىرىلادى.
ايماقتىق كوممۋنيكاتسيالار قىزمەتىندە وتكەن ارنايى بريفينگتە وبلىس اكىمىنىڭ ورىنباسارى اسەم ءنۇسىپوۆا جوبالارعا توقتالىپ، ولاردىڭ ىسكە اسىرىلۋ بارىسى تۋرالى مالىمدەدى.
بۇگىنگى تاڭدا وبلىستا 14 جانە 29 جاس ارالىعىندا 264 990 ادام تۇرادى، ياعني ايماق تۇرعىندارىنىڭ 20%-ن قۇرايدى. وڭىردە «جاس كاسىپكەر» جوباسى اياسىندا 24 شىلدەدەن باستاپ 18 بەن 29 جاس ارالىعىنداعى 1300 ادام كاسىپكەرلىك نەگىزدەرى بويىنشا ارنايى وقىتۋ كۋرسىنان وتە الادى. بۇل توپقا كوپبالالى جانە جاس وتباسى مۇشەلەرى، جۇمىسقا جارامدى مۇگەدەكتەر دە كىرەدى. ودان كەيىن ارنايى بيزنەس جوبا ازىرلەپ، 200 ايلىق ەسەپتىك كورسەتكىشكە دەيىن (505 مىڭ تەڭگە) قايتارىلمايتىن گرانتقا يە بولادى. بۇل قاراجاتقا كاسىپكە كەرەك قۇرالدارىن، اۋىلشارۋاشىلىعىن دوڭگەلەتەمىن دەگەندەر مال جانە قۇس ساتىپ الادى. بارلىعى 1277 ادام وسىنداي گرانتقا يە بولادى. باعدارلاماعا قاتىسۋ ءۇشىن تۇرعىلىقتى جەرلەردەگى جۇمىسپەن قامتۋ ورتالىقتارى مەن بولىمدەرىنە ءوتىنىش ءبىلدىرۋ كەرەك.
كەلەسى ءۇش جوبا قر اقپارات جانە قوعامدىق دامۋ مينيسترلىگى بويىنشا ازاماتتىق باستامالاردى قولداۋ ورتالىعى مەملەكەتتىك گرانتى اياسىندا جۇزەگە اسىرىلادى. اتالمىش جوبالار تۋرالى اقپاراتتى وبلىستاعى قالا جانە اۋداندارداعى جاستار رەسۋرستىق ورتالىقتارىنان الۋعا بولادى، ورتالىقتاردىڭ مەكەن-جايى eljastary.kz سايتىندا كورسەتىلگەن.
ايتا كەتسەك، «JasA!» جوباسى بويىنشا قالا جانە اۋىلداردى دامىتۋ جانە ەكولوگيالىق جاعدايىن جاقسارتۋعا باعىتتالعان الەۋمەتتىك جوبالار جۇزەگە اسىرىلادى. «جۇمىسكەر جاستاردىڭ قوعامداستىعى» قوعامدىق ۇيىمى قاتىسۋشىلارعا كەڭەس بەرىپ، جول سىلتەيتىن بولادى. بۇل جوباعا قاتىسۋ شارتى وتە وڭاي، 26 شىلدەگە دەيىن jashome.org سايتىندا تىركەلىپ، بەس ادامعا دەيىن شاعىن توپتارعا بىرىگۋ قاجەت. بايقاۋ نەگىزىندە ۇزدىكتەر ىرىكتەلىپ، 610 مىڭعا دەيىن قارجىلاي گرانتتار بولىنەدى. جوسپار بويىنشا ەلىمىزدە 660 جاستى قامتىپ، 100 جوبا ىسكە اسىرىلماق.
1 تامىزدان باستاپ وبلىستا «Qorgau» جوباسى اياسىندا قالالىق جانە اۋداندىق جاستار رەسۋرستىق ورتالىقتارىندا 20 تاجىريبەلى زاڭگەرلەر ءوز جۇمىسىن باستايدى. بۇل جوبانىڭ ماقساتى ازاماتتاردىڭ، ونىڭ ىشىندە جاستاردىڭ قۇقىعىن قورعاۋ ءۇشىن اقىسىز ءارى قولجەتىمدى قۇرىلىم قۇرۋ. جوبا «Eurasian Expert Council» قوعامدىق قورىنىڭ قولداۋىمەن جۇزەگە اسىرىلادى. زاڭگەر كەڭەسىن 5 مىڭنان استام ادام الا الادى.
14 شىلدەدەن باستاپ مەنتورلىق جوبا ىسكە اسىرىلۋدا. تالىمگەرلەر جاستارعا قۇقىقتىق، كاسىبي شەبەرلىك سۇراقتارى بويىنشا كەڭەس بەرەدى. شىعىس قازاقستاننىڭ مەنتورلارى نۇر-سۇلتان قالاسىندا 4 كۇندىك وقىتۋ كۋرستارىن ءتامامدادى.
وبلىستاعى جاستار ساياساتى جاستار جىلىنىڭ جول كارتاسى اياسىندا جۇزەگە اسىرىلۋدا. ونىڭ ىشىندە جاستاردى جۇمىسپەن قامتۋ مىندەتتەرى «ەڭبەك»، «جاستار تاجىريبەسى»، «بيزنەستىڭ جول كارتاسى -2020»، «ديپلوممەن اۋىلعا» مەملەكەتتىك باعدارلامالار بويىنشا ىسكە قوسىلعان،-دەدى وبلىس اكىمىنىڭ ورىنباسارىۆ اسەم ءنۇسىپوۆا.
اعىمداعى جىلدىڭ باسىنان جۇمىسپەن قامتۋ بولىمدەرىنە شاعىمدانعان 4,5 مىڭ جاستار تىركەلگەن، ونىڭ 50%-ى اۋىلدا تۇرادى. ولاردىڭ بارلىعى جۇمىسپەن قامتۋ شارالارىمەن قامتاماسىز ەتىلگەن. 15 جاس «بيزنەستىڭ جول كارتاسى-2020» بويىنشا گرانت يەگەرلەرى اتاندى. «ديپلوممەن اۋىلعا» باعدارلاماسى بويىنشا 40,6 ملن تەڭگەگە 230 جاس اۋىلدا قىزمەت ەتۋگە جولداما الدى. 149 ادام تۇرعىن ءۇي قۇرىلىسى مەن ساتىپ الۋعا بيۋدجەتتىك نەسيەلەرگە يە بولدى.
"ادىرنا" ۇلتتىق پورتالى
