Jastar jyly aıasynda oblysta jastar saıasatyna arnalǵan tórt jańa joba iske asyrylady.
Aımaqtyq kommýnıkaııalar qyzmetinde ótken arnaıy brıfıngte oblys ákiminiń orynbasary Ásem Núsipova jobalarǵa toqtalyp, olardyń iske asyrylý barysy týraly málimdedi.
Búgingi tańda oblysta 14 jáne 29 jas aralyǵynda 264 990 adam turady, ıaǵnı aımaq turǵyndarynyń 20%-n quraıdy. Óńirde «Jas kásipker» jobasy aıasynda 24 shildeden bastap 18 ben 29 jas aralyǵyndaǵy 1300 adam kásipkerlik negizderi boıynsha arnaıy oqytý kýrsynan óte alady. Bul topqa kópbalaly jáne jas otbasy músheleri, jumysqa jaramdy múgedekter de kiredi. Odan keıin arnaıy bıznes joba ázirlep, 200 aılyq eseptik kórsetkishke deıin (505 myń teńge) qaıtarylmaıtyn grantqa ıe bolady. Bul qarajatqa kásipke kerek quraldaryn, aýylsharýashylyǵyn dóńgeletemin degender mal jáne qus satyp alady. Barlyǵy 1277 adam osyndaı grantqa ıe bolady. Baǵdarlamaǵa qatysý úshin turǵylyqty jerlerdegi jumyspen qamtý ortalyqtary men bólimderine ótinish bildirý kerek.
Kelesi úsh joba QR Aqparat jáne qoǵamdyq damý mınıstrligi boıynsha azamattyq bastamalardy qoldaý Ortalyǵy memlekettik granty aıasynda júzege asyrylady. Atalmysh jobalar týraly aqparatty oblystaǵy qala jáne aýdandardaǵy jastar resýrstyq ortalyqtarynan alýǵa bolady, ortalyqtardyń meken-jaıy eljastary.kz saıtynda kórsetilgen.
Aıta ketsek, «JasA!» jobasy boıynsha qala jáne aýyldardy damytý jáne ekologııalyq jaǵdaıyn jaqsartýǵa baǵyttalǵan áleýmettik jobalar júzege asyrylady. «Jumysker jastardyń qoǵamdastyǵy» qoǵamdyq uıymy qatysýshylarǵa keńes berip, jol silteıtin bolady. Bul jobaǵa qatysý sharty óte ońaı, 26 shildege deıin jashome.org saıtynda tirkelip, bes adamǵa deıin shaǵyn toptarǵa birigý qajet. Baıqaý negizinde úzdikter iriktelip, 610 myńǵa deıin qarjylaı granttar bólinedi. Jospar boıynsha elimizde 660 jasty qamtyp, 100 joba iske asyrylmaq.
1 tamyzdan bastap oblysta «Qorgau» jobasy aıasynda qalalyq jáne aýdandyq jastar resýrstyq ortalyqtarynda 20 tájirıbeli zańgerler óz jumysyn bastaıdy. Bul jobanyń maqsaty azamattardyń, onyń ishinde jastardyń quqyǵyn qorǵaý úshin aqysyz ári qoljetimdi qurylym qurý. Joba «Eurasian Expert Council» qoǵamdyq qorynyń qoldaýymen júzege asyrylady. Zańger keńesin 5 myńnan astam adam ala alady.
14 shildeden bastap mentorlyq joba iske asyrylýda. Tálimgerler jastarǵa quqyqtyq, kásibı sheberlik suraqtary boıynsha keńes beredi. Shyǵys Qazaqstannyń mentorlary Nur-Sultan qalasynda 4 kúndik oqytý kýrstaryn támamdady.
Oblystaǵy jastar saıasaty Jastar jylynyń Jol kartasy aıasynda júzege asyrylýda. Onyń ishinde jastardy jumyspen qamtý mindetteri «Eńbek», «Jastar tájirıbesi», «Bıznestiń jol kartasy -2020», «Dıplommen aýylǵa» memlekettik baǵdarlamalar boıynsha iske qosylǵan,-dedi oblys ákiminiń orynbasaryv Ásem Núsipova.
Aǵymdaǵy jyldyń basynan jumyspen qamtý bólimderine shaǵymdanǵan 4,5 myń jastar tirkelgen, onyń 50%-y aýylda turady. Olardyń barlyǵy jumyspen qamtý sharalarymen qamtamasyz etilgen. 15 jas «Bıznestiń jol kartasy-2020» boıynsha grant ıegerleri atandy. «Dıplommen aýylǵa» baǵdarlamasy boıynsha 40,6 mln teńgege 230 jas aýylda qyzmet etýge joldama aldy. 149 adam turǵyn úı qurylysy men satyp alýǵa bıýdjettik nesıelerge ıe boldy.
"Adyrna" ulttyq portaly
