ۇلى اباي قۇنانبايۇلىنىڭ 175-جىلدىعى اياسىندا ۇيىمداستىرىلعان ابايدىڭ «جيدەباي-ءبورىلى» مەملەكەتتىك قورىق-مۋزەيىندە «ۇلىلار مۇراسىنا تاعزىم» رۋحاني-تانىمدىق ەكسپەديتسياسىنىڭ قورىتىندىلاۋ ءراسىمى ءوتتى.
اتالمىش ەكسپەديتسياعا قىزىلوردا وبلىسىنىڭ قالالارى مەن اۋداندارىنداعى مەكتەپ مۇعالىمدەرى مەن وقۋشىلارىنان قۇرالعان 25 ادام قاتىستى. ولار اباي، شاكارىم، مۇحتارداي دارالار تۋعان مەكەنگە كەلىپ، ۇلىلار رۋحىنا تاعزىم ەتتى.
- ەكسپەديتسيا مۇشەلەرى سەمەيدەگى «بەيبىتشىلىك» ارالى، «الاش ارىستارى - مۇحتار اۋەزوۆ» مۋزەيى، وبلىستىق تاريحي ولكەتانۋ مۋزەيى سياقتى قالانىڭ كورنەكتى جەرلەرىمەن تانىسىپ، كۇشىكباي بۇلاعى، عازيزا بەيىتى، بورىلىدەگى مۇحتار اۋەزوۆتىڭ مۋزەي-ءۇيى، حاكىم ابايدىڭ تۋعان جەرى «سىرت-قاسقابۇلاق»، ەرالى جازىعىنداعى «ەڭلىك-كەبەك» كەسەنەسى، جيدەباي جەرىندەگى ابايدىڭ مۋزەي-ءۇيى، «اباي-شاكارىم» ماۆزولەي-كەشەنى، كەڭگىرباي بي كەسەنەسى، «قوڭىر اۋليە» ۇڭگىرى سىندى حالقىمىزدىڭ تاريحى مەن تاعدىرى جولىنداعى ۇلكەن ماڭىزعا يە تاريحي مەكەندەر مەن رۋحاني ورىنداردى ارالادى، - دەدى ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ ءباسپاسوز حاتشىسى قۋات قيىقباي.
«ۇلىلار مۇراسىنا تاعزىم» رۋحاني-تانىمدىق ەكسپەديتسياسىنا ارنالعان شارا بارىسىندا مۇعالىمدەر مەن مەكتەپ وقۋشىلارى العان اسەرلەرىمەن ءبولىسىپ، اباي، شاكارىم، مۇحتار شىعارمالارىنان ۇزىندىلەر وقىدى.
شارا سوڭىندا اباي مۇراسىن ناسيحاتتاۋعا ۇلەس قوسقان ەكسپەديتسيا مۇشەلەرىنە ابايدىڭ «جيدەباي-ءبورىلى» مەملەكەتتىك قورىق-مۋزەيى مەن شاكارىم اتىنداعى سەمەي مەملەكەتتىك ۋنيۆەرسيتەتىنىڭ العىس حاتتارى مەن سەرتيفيكاتتارى تابىستالدى.
"ادىرنا" ۇلتتىق پورتالى
