سەمەيدە 1942 جىلى ۇلى وتان سوعىسىنا شاقىرتۋ العان سوعىس ارداگەرى سارتاي بەيىمبەتوۆتىڭ دەنەسىن قايتا جەرلەۋ ءراسىمى ءوتتى.
ءىس-ءتۇسسىز جوعالعان ارداگەر جايلى اقپاراتتى بىلۋگە تۋىستارى سوڭعى 7 جىلعا جۋىق ىزدەۋ سالعان. ناتيجەسىندە ارداگەردىڭ رەسەي فەدەراتسياسى كالينين وبلىسى، ستاريتسكي اۋدانى، لەبەدەۆو اۋىلىندا جەرلەنگەنى انىقتالدى. قورعانىس مينيسترلىگى ورتالىق مۇراعاتىنىڭ حابارلاۋىنشا، ارداگەر العان جاراقاتىنان 1943 جىلى قايتىس بولعان. ول ءوزىنىڭ جاۋىنگەرلىك جولىن قىزىل اسكەر قۇرامىندا 653 اتقىشتار پولكىندە، 102-ءشى ديۆيزيادا وتەگەن.
- مەن ءوزىمدى باقىتتىمىن دەپ سانايمىن. وسى ۋاقىتقا دەيىن كوزىم جاستان قۇرعاماي، اكەم جايلى اقپاراتتى بىلمەي كەتەمىن با دەگەن ويمەن ءجۇردىم. كوڭىلىم بۇگىن ورنىنا ءتۇستى. رەسەي فەدەراتسياسىنىڭ لەبەدەۆو اۋىلىندا اكەم جەرلەنىپتى. جاسىم 82-گە كەلسە دە، باسىنا بارىپ، قۇران باعىشتادىم. ەسكەرتكىشىن كوردىم. بارشا اتسالىسقان جاندارعا ايتار العىسىم شەكسىز. كەيىنگى ۇرپاق سوعىس اتاۋلىنى كورمەي، بەيبىتشىلىكتە ءومىر سۇرسە ەكەن دەپ تىلەك بىلدىرەمىن،- دەدى ارداگەردىڭ قىزى شايجامال سارتايقىزى.
سارتاي بەيىمبەتوۆتىڭ تۋىستارى قابىرىنەن ءبىر ۋىس توپىراعىن الىپ، سەمەيدەن 30 شاقىرىم جەردە ورنالاسقان تۋعان جەرىنە اپارىپ جەرلەدى.
"ادىرنا" ۇلتتىق پورتالى
