بۇگىن شقو اكىمى دانيال احمەتوۆتىڭ تاپسىرماسىنا سايكەس وبلىس اكىمىنىڭ ورىنباسارى الماسحان سماتلاەۆ باستاعان ارنايى جۇمىس توبى باس مەردىگەر «سينسين» كومپانياسى جۇرگىزىپ جاتقان «قالباتاۋ-مايقاپشاعاي» جول جوندەۋ ۋچاسكەسىندەگى جۇمىسشىلارمەن كەزدەستى. جۇمىس توبىنىڭ قۇرامىندا شقو پروكۋراتۋراسى، شقو ىشكى ىستەر دەپارتامەنتى، وبلىستىق ەڭبەك ينسپەتسياسى باسقارماسىنىڭ، شقو كولىك جانە اۆتوموبيل جولدارى باسقارماسىنىڭ باسشىلارى، شقو تاۋار جانە قىزمەت قاۋىپسىزدىگى ساپاسىن باقىلاۋ دەپارتامەنتى، «كازاۆتوجول» اق شقوف باسشىلارى بار.
جۇمىسشىلاردىڭ باستى شارتى – جۇمىس جانە تۇرۋ شارتتارىن جاقسارتۋ، جالاقى مولشەرىن كوتەرۋ. كەزدەسۋ بارىسىندا وبلىس باسشىلىعىمەن «سينسين» كومپانياسىنىڭ باس ديرەكتورى اراسىندا ورتاق كەلىسىم حاتتاماسىنا قول قويىلدى:
بارلىق ەڭبەك كەلىسىمدەرى قر زاڭناماسىنا سايكەس رەتكە كەلتىرىلىپ، جۇمىسشىلارعا 3 كۇن مەرزىمىندە تۇسىندىرىلەتىن بولادى.
ەگەر جۇمىسشىلار تۇنگى ۋاقىتتا، دەمالىس كۇندەرى، بەلگىلەنگەن ۋاقىتتان تىس ەڭبەك ەتسە، جالاقى مولشەرى 1,5 ەسە كولەمىندە تولەنەدى.
10 كۇن مەرزىمىندە بارلىق تۇرعىلىقتى جەرلەردە سالقىنداتقىشتار ورناتىلىپ، قر زاڭناماسىنا سايكەس رەتكە كەلتىرىلەدى.
بارلىق جۇمىسشىلارعا 10 كۇن مەرزىمىندە ارنايى جۇمىس كيىمى بەرىلەتىن بولادى.
جۇمىسشىلاردىڭ تۇراتىن جەرلەرىندە كۇنىنە ءۇش رەت تاماقتاندىرۋ ۇيىمداستىرىلادى.
جۇمىسشىلاردىڭ ەڭ تومەنگى جالاقى مولشەرى 80000-نان 120000 تەڭگەگە كوتەرىلەدى.
جالپى جۇمىسشىلاردىڭ جالاقىسى اتقارعان جۇمىستارىنا سايكەس 120.000 تەڭگەدەن 360.000 تەڭگەگە دەيىن بولادى.
جاعداي قالىپقا كەلتىرىلدى، مەكەمە كەستەگە سايكەس جۇمىس ىستەپ تۇر. ساعات 14.00-گە قاراي بارلىق جۇمىسشىلار ءوز مىندەتتەرىن اتقارۋعا كىرىستى. جۇمىسشىلار وبلىس باسشىلىعىنا ماسەلەنى تەزدەتىپ شەشىپ جانە كورسەتىلگەن كومەكتەرى ءۇشىن ريزاشىلىقتارىن ءبىلدىردى.
بۇدان تىس، شقو بويىنشا مەملەكەتتىك ەڭبەك ينسپەكتسياسى باسقارماسىنا، «كازاۆتوجول» اق شقوف-نا (كەلىسىم بويىنشا) جانە وزگە جاۋاپتى قۇزىرلى ورگاندار الدىنا قازاقستان رەسپۋبليكاسى زاڭناماسىنا سايكەس ەڭبەك كەلىسىمدەرىنە تەكسەرۋ جۇمىستارىن جۇرگىزۋ مىندەتى قويىلدى. سونىمەن قاتار جول قۇرىلىسى مەن جوندەۋ جۇمىستارىنا جۇمىلدىرىلعان شەتەلدىك كومپانيالارداعى قازاقستاندىق جۇمىسشىلارعا جالاقى تولەۋ مەن ەڭبەك جاعدايىن جاساۋدى باقىلاۋ.
حاتتامانىڭ ورىندالۋى بويىنشا شقو اكىمدىگى تاراپىنان باقىلاۋ جۇرگىزۋ بەكىتىلگەن.
شىعىس قازاقستان وبلىسى اكىمىنىڭ ءباسپاسوز قىزمەتى
"ادىرنا" ۇلتتىق پورتالى
