ورال قالاسىنىڭ «اتامەكەن» ونەر ورداسىندا «Aqjayiq Fashion Festival» ءسان فەستيۆالىنىڭ ءىىى ماۋسىمى «ۇلتتىق كيىم – ۇرپاققا مۇرا» اتاۋىمەن ءوتتى.
جەڭىل ونەركاسىپ قىزمەتكەرلەرى كۇنىنە ارنالعان ءسان كورسەتىلىمىنە سوناۋ تۇركيا ەلىنە بەلگىلى ديزاينەر، «Art Fashion Week Europe» نەگىزىن قالاۋشى ايدىن اچيك، قىرعىزستان ديزاينەرلەر اسسوساتسياسىنىڭ بەلسەندى وكىلى نۇرزات جەەنبەك، رف تاتارستان رەسپۋبليكاسىنان كەلگەن دەلەگاتسيانى باستاۋشى قازان مەملەكەتتىك ونەر-مادەنيەت ينستيتۋتىنىڭ دوتسەنتى، ەۋرازيالىق ەتنو-ديزاينەرلەر قاۋىمداستىعىنىڭ مۇشەسى راسىح سالاحوۆ، حالىقارالىق ءسان اپتالىقتارىنىڭ قاتىسۋشىسى ەلۆينا داۆليەۆا، قازاندىق «ناۆرۋز» ءسان كوللەكتسياسىنىڭ جاس ديزاينەرى نايليا بۋرگانوۆا جانە ەلىمىزدىڭ استانا، تاراز، اقتوبە، اتىراۋ، شىمكەنت قالالارىنان كەلگەن قوناقتار قاتىستى. سالتاناتتى ءىس-شارادا وڭىردەگى ديزاينەر ماماندار دا بوي كورسەتتى. سونداي-اق اتالمىش سالاعا قىزىعۋشىلىعى بار جاستار دا تاماشالاۋعا جينالدى. شارا بارىسىندا وبلىستىق قوعامدىق دامۋ باسقارماسىنىڭ باسشىسى گۇلجانار شوكەەۆا قادىرلى قوناقتارعا ريزاشىلىعىن ءبىلدىرىپ، فەستيۆالدىڭ ءىىى ماۋسىمىنىڭ اشىلۋىمەن قۇتتىقتادى.
– اق جايىق ءوڭىرى – ەۋروپا مەن ازيانىڭ التىن كوپىرى ىسپەتتى. مۇندا تالاي جىراۋلار مەن اقىندار، ونەر تارلاندارى مەن باتىرلار مەكەن ەتىپ، ازاتتىقتىڭ اق تاڭى ءۇشىن كۇرەسكەن. بۇل فەستيۆال بيىل ەرەكشە اتاۋمەن وتۋدە. جالپى ۇلتتىق كيىم – ۇلتىمىزدىڭ ايناسى. قازاقتىڭ ۇلتتىق كيىمى حالىقتىڭ تامىرىن تەرەڭگە جايعان قولدانبالى ونەرىنىڭ سارقىلماس قازىناسى ەكەنىن اڭعارۋعا بولادى. جاھاندانۋ زامانىندا ۇلتتىق بولمىسىمىزدى ساقتاپ قالۋ ءۇشىن ءوز كيىمدەرىمىزدى دارىپتەۋ جانە سول ارقىلى سالت-ءداستۇر، ادەت-عۇرپىمىزدى كەڭىنەن ناسيحاتتاۋ وتە ماڭىزدى. مەملەكەت باسشىسى قاسىم-جومارت توقاەۆتىڭ تاپسىرماسى اياسىندا ناۋرىز مەيرامىن تويلاۋدىڭ جاڭا فورماتى شەڭبەرىندە 18 ناۋرىز – ۇلتتىق كيىم كۇنى بولىپ بەلگىلەنگەنى بارشاعا بەلگىلى. دانا ابايدىڭ «كيىم كيۋ سالتى ارقىلى ادامنىڭ مىنەز-قۇلقى، قوعامداعى ورنى، بولمىسى انىقتالادى» دەگەن ءسوزى بار. بۇگىندە ۇلتتىق كيىم ءسان-سالتاناتى جاعىنان الەمدە مويىندالعان برەندكە اينالىپ وتىر. وسى رەتتە وزگە مەملەكەتتەردەن قازاقستاندىق ديزاينەرلەر قاۋىمداستىعىن قولداپ كەلگەن قوناقتارعا العىس ايتامىن. ۇلتتىق كيىم – ءبىزدىڭ ۇلتتىق نىشانىمىز، – دەدى گۇلجانار بولاتقىزى.
ايتا كەتەيىك، اتالعان فەستيۆالدىڭ العاشقى ماۋسىمىندا قىز جىبەك وبرازى كەڭىنەن دارىپتەلگەن بولسا، كەزەكتى ەكىنشى جىلدا تاقساي حانشايىمى جانە بيىل جاڭگىر حان مەن فاتيما بەينەلەرى نەگىزگە الىنعان. ءسان كورسەتىلىمىندە جينالعان جۇرتتىڭ نازارىنا ءتۇرلى وبرازدار، ياعني 22 كيىم توپتاماسى ۇسىنىلدى. ءار توپتاما وزگەشە باعىتىمەن اۋتوردىڭ قيالى مەن ەڭبەگىنەن حابار بەرىپ وتىرعانداي بولدى. سونداي-اق اراسىندا «وتباسى» تاقىرىبىنداعى كومپوزيتسيا قويىلىپ، تاماشالاعاندارعا وي سالىپ، ۇلتتىق قۇندىلىقتاردى ناسيحاتتادى. ونداعى ۇلتتىق كيىم مەن شاڭىراقتىڭ ۇلگىسى بەلگىلى ءبىر ۋاقىتتان نەمەسە زاماننان سىر شەرتىپ تۇرعانداي اسەر قالدىردى.
شاڭىراقتىڭ بيىك، كەرەگەنىڭ كەڭ جانە بوساعانىڭ بەرىك بولۋىنا ىقپال ەتەتىن ادامي قاسيەتتەر مەن ۇلتتىق تاربيەنىڭ ماڭىزى كورسەتىلدى. وتباسىنداعى اكەنىڭ بولمىسى مەن ورنى، انانىڭ شەكسىز مەيىرىمى ءھام بالانىڭ اتا-اناعا قاراپ بوي تۇزەۋى وبرازدار ارقىلى بەرىلىپ، قازاقى تانىم-تۇسىنىكتىڭ تەرەڭدىگىن دالەلدەي ءتۇستى.
امانجول يسلامعالي
