Oral qalasynyń «Atameken» óner ordasynda «Aqjayiq Fashion Festival» sán festıvaliniń III maýsymy «Ulttyq kıim – urpaqqa mura» ataýymen ótti.
Jeńil ónerkásip qyzmetkerleri kúnine arnalǵan sán kórsetilimine sonaý Túrkııa eline belgili dızaıner, «Art Fashion Week Europe» negizin qalaýshy Aıdyn Achık, Qyrǵyzstan dızaınerler assosaııasynyń belsendi ókili Nurzat Jeenbek, RF Tatarstan Respýblıkasynan kelgen delegaııany bastaýshy Qazan memlekettik óner-mádenıet ınstıtýtynyń doenti, Eýrazııalyq etno-dızaınerler qaýymdastyǵynyń múshesi Rasyh Salahov, halyqaralyq sán aptalyqtarynyń qatysýshysy Elvına Davlıeva, qazandyq «Navrýz» sán kollekııasynyń jas dızaıneri Naılıa Býrganova jáne elimizdiń Astana, Taraz, Aqtóbe, Atyraý, Shymkent qalalarynan kelgen qonaqtar qatysty. Saltanatty is-sharada óńirdegi dızaıner mamandar da boı kórsetti. Sondaı-aq atalmysh salaǵa qyzyǵýshylyǵy bar jastar da tamashalaýǵa jınaldy. Shara barysynda oblystyq qoǵamdyq damý basqarmasynyń basshysy Gúljanar Shókeeva qadirli qonaqtarǵa rızashylyǵyn bildirip, festıvaldiń III maýsymynyń ashylýymen quttyqtady.
– Aq Jaıyq óńiri – Eýropa men Azııanyń altyn kópiri ispetti. Munda talaı jyraýlar men aqyndar, óner tarlandary men batyrlar meken etip, azattyqtyń aq tańy úshin kúresken. Bul festıval bıyl erekshe ataýmen ótýde. Jalpy ulttyq kıim – ultymyzdyń aınasy. Qazaqtyń ulttyq kıimi halyqtyń tamyryn tereńge jaıǵan qoldanbaly óneriniń sarqylmas qazynasy ekenin ańǵarýǵa bolady. Jahandaný zamanynda ulttyq bolmysymyzdy saqtap qalý úshin óz kıimderimizdi dáripteý jáne sol arqyly salt-dástúr, ádet-ǵurpymyzdy keńinen nasıhattaý óte mańyzdy. Memleket basshysy Qasym-Jomart Toqaevtyń tapsyrmasy aıasynda Naýryz meıramyn toılaýdyń jańa formaty sheńberinde 18 naýryz – Ulttyq kıim kúni bolyp belgilengeni barshaǵa belgili. Dana Abaıdyń «Kıim kııý salty arqyly adamnyń minez-qulqy, qoǵamdaǵy orny, bolmysy anyqtalady» degen sózi bar. Búginde ulttyq kıim sán-saltanaty jaǵynan álemde moıyndalǵan brendke aınalyp otyr. Osy rette ózge memleketterden qazaqstandyq dızaınerler qaýymdastyǵyn qoldap kelgen qonaqtarǵa alǵys aıtamyn. Ulttyq kıim – bizdiń ulttyq nyshanymyz, – dedi Gúljanar Bolatqyzy.
Aıta keteıik, atalǵan festıvaldiń alǵashqy maýsymynda Qyz Jibek obrazy keńinen dáriptelgen bolsa, kezekti ekinshi jylda Taqsaı hanshaıymy jáne bıyl Jáńgir han men Fatıma beıneleri negizge alynǵan. Sán kórsetiliminde jınalǵan jurttyń nazaryna túrli obrazdar, ıaǵnı 22 kıim toptamasy usynyldy. Ár toptama ózgeshe baǵytymen aýtordyń qııaly men eńbeginen habar berip otyrǵandaı boldy. Sondaı-aq arasynda «Otbasy» taqyrybyndaǵy kompozıııa qoıylyp, tamashalaǵandarǵa oı salyp, ulttyq qundylyqtardy nasıhattady. Ondaǵy ulttyq kıim men shańyraqtyń úlgisi belgili bir ýaqyttan nemese zamannan syr shertip turǵandaı áser qaldyrdy.
Shańyraqtyń bıik, keregeniń keń jáne bosaǵanyń berik bolýyna yqpal etetin adamı qasıetter men ulttyq tárbıeniń mańyzy kórsetildi. Otbasyndaǵy ákeniń bolmysy men orny, ananyń sheksiz meıirimi hám balanyń ata-anaǵa qarap boı túzeýi obrazdar arqyly berilip, qazaqy tanym-túsiniktiń tereńdigin dáleldeı tústi.
Amanjol ISLAMǴALI