قازاقستان پرەزيدەنتى قاسىم-جومارت توقاەۆ 1988 جىلى قىتايدا جەمقورلارعا ءولىم جازاسىن ورىنداعان ساتكە كۋا بولعانىن ايتتى.
«پرەزيدەنت 2.0» دەرەكتى فيلمىندە قازاقستان باسشىسى قىتايدا وقىپ، جۇمىس ىستەگەن جىلدارىن ەسكە ءتۇسىردى. توقاەۆ سول كەزدە قىتايدىڭ وڭتۇستىك قالالارىنىڭ بىرىندە ءولىم جازاسىن ءوز كوزىمەن كورگەنىن جاسىرمادى.
«ءبىر جولى ستاديوندا جەمقورلاردى قالاي اتىپ جاتقانىن كوردىم. سۇمدىق اسەر قالدىردى. ادامداردى جۇك كولىگىمەن اكەلىپ، ءتۇسىردى، كوزدەرىن بايلاپ قويعان، تىزەرلەپ وتىرعىزىپ، ولارعا ۇكىمدى وقىدى، سودان سوڭ ارقايسىنىڭ جەلكەسىنەن اتتى»، – دەيدى پرەزيدەنت.
قازاقستان پرەزيدەنتى قىتاي باسشىلىعىنىڭ قىلمىسپەن كۇرەس ادىستەرىن ايىپتامايتىنىن مويىندادى. ويتكەنى بۇل مەملەكەتتىڭ تاريحي-مادەني ءداستۇرى وسىنداي.
«ەگەر ولار سىبايلاس جەمقورلىققا عانا ەمەس، اۋىر قاراقشىلىق شابۋىلعا، زورلاۋعا، بانك توناۋعا مۇنداي جازا قولدانبايتىن بولسا، ەلدەگى جاعدايدى رەتتەي الماۋى مۇمكىن»، – دەدى قازاقستان باسشىسى.
قاسىم-جومارت توقاەۆ قىتاي ۇلكەن الەۋەتكە يە ەكەنىن اتاپ ءوتتى. قىتاي ەكونوميكالىق جەتىستىككە، مەملەكەت باسشىسىنىڭ پىكىرىنشە، اۋقىمدى رەفورمالار مەن شەكارالاس اۋماقتارداعى نارىقتى اشۋدىڭ ارقاسىندا قول جەتكىزىپ وتىر.
ايتا كەتەيىك، 31 ارنادا كورسەتىلگەن «پرەزيدەنت 2.0 » دەرەكتى فيلمىندە توقاەۆ ءوزىنىڭ ءومىربايانى، ديپلوماتيالىق كارەراسى، جەكە سەنىمى تۋرالى رەسەيلىك جۋرناليست الەكسەي پيۆوۆاروۆتىڭ سۇراقتارىنا اشىق جاۋاپ بەرەدى.
فيلمدە مەملەكەت باسشىسى قازاقستاننىڭ رەسەيمەن، قىتايمەن جانە باسقا ەلدەرمەن قارىم-قاتىناسى تۋرالى اڭگىمەلەيدى، ءوزى كەزدەسكەن كوپتەگەن بەدەلدى الەمدىك ساياساتكەرگە ەرەكشە باعا بەرەدى.
"ادىرنا" ۇلتتىق پورتالى
