Qazaqstan prezıdenti Qasym-Jomart Toqaev 1988 jyly Qytaıda jemqorlarǵa ólim jazasyn oryndaǵan sátke kýá bolǵanyn aıtty.
«Prezıdent 2.0» derekti fılminde Qazaqstan basshysy Qytaıda oqyp, jumys istegen jyldaryn eske túsirdi. Toqaev sol kezde Qytaıdyń ońtústik qalalarynyń birinde ólim jazasyn óz kózimen kórgenin jasyrmady.
«Bir joly stadıonda jemqorlardy qalaı atyp jatqanyn kórdim. Sumdyq áser qaldyrdy. Adamdardy júk kóligimen ákelip, túsirdi, kózderin baılap qoıǵan, tizerlep otyrǵyzyp, olarǵa úkimdi oqydy, sodan soń árqaısynyń jelkesinen atty», – deıdi prezıdent.
Qazaqstan prezıdenti Qytaı basshylyǵynyń qylmyspen kúres ádisterin aıyptamaıtynyn moıyndady. Óıtkeni bul memlekettiń tarıhı-mádenı dástúri osyndaı.
«Eger olar sybaılas jemqorlyqqa ǵana emes, aýyr qaraqshylyq shabýylǵa, zorlaýǵa, bank tonaýǵa mundaı jaza qoldanbaıtyn bolsa, eldegi jaǵdaıdy retteı almaýy múmkin», – dedi Qazaqstan basshysy.
Qasym-Jomart Toqaev Qytaı úlken áleýetke ıe ekenin atap ótti. Qytaı ekonomıkalyq jetistikke, memleket basshysynyń pikirinshe, aýqymdy reformalar men shekaralas aýmaqtardaǵy naryqty ashýdyń arqasynda qol jetkizip otyr.
Aıta keteıik, 31 arnada kórsetilgen «Prezıdent 2.0 » derekti fılminde Toqaev óziniń ómirbaıany, dıplomatııalyq karerasy, jeke senimi týraly reseılik jýrnalıst Alekseı Pıvovarovtyń suraqtaryna ashyq jaýap beredi.
Fılmde memleket basshysy Qazaqstannyń Reseımen, Qytaımen jáne basqa eldermen qarym-qatynasy týraly áńgimeleıdi, ózi kezdesken kóptegen bedeldi álemdik saıasatkerge erekshe baǵa beredi.
"Adyrna" ulttyq portaly
