پرەزيدەنت قاسىم-جومارت توقاەۆ ۇلتتىق مۋزەيدەگى ونەر تۋىندىلارى كورمەسىن تاماشالادى دەپ حابارلادى، مەملەكەت باسشىسىنىڭ ءباسپاسوز-قىزمەتى.
پرەزيدەنتكە ونەرتانۋشى ولگا باتۋرينا قازاقستاندىق تالانتتى قىلقالام شەبەرلەرىنىڭ تۋىندىلارى جيناقتالعان «دالا كەسكىندەمەسى: رامىزدەر، بوياۋلار، بەينەلەر» اتتى كورمەنى تانىستىردى.
ونىڭ اياسىندا قاسىم-جومارت توقاەۆ ايگىلى يتاليالىق سۋرەتشى لەوناردو دا ءۆينچيدىڭ «ادەمى حانشايىم» (La bella principessa) كارتيناسىنىڭ تۇپنۇسقاسىن دا كوردى. تانىمال تۋىندىنىڭ كورمەسى ۇلتتىق مۋزەيدىڭ 10 جىلدىعىنا وراي يتاليانىڭ «Scripta Maneant» باسپاسىمەن بىرلەسە ۇيىمداستىرىلعان. جوعارى رەنەسسانس داۋىرىنە جاتاتىن بۇل قۇندى جادىگەر ەۋروپادان تىسقارى جەرگە العاش رەت شىعارىلىپ وتىر.
كورمە ەلىمىزدىڭ مادەنيەت جانە اقپارات مينيسترلىگىنىڭ، يتاليانىڭ قازاقستانداعى ەلشىلىگىنىڭ جانە يتاليا مادەنيەت ينستيتۋتىنىڭ قولداۋىمەن ءوتىپ جاتىر.
ەلوردا تۇرعىندارى مەن قوناقتارى لەوناردو دا ءۆينچيدىڭ وسىناۋ بىرەگەي تۋىندىسىن 4 تامىزعا دەيىن تاماشالاي الادى.
كورمەنىڭ بىزدە وتۋىنە ForteBank مۇرىندىق بولدى.
«ForteBank اتىنان ءبىز لەوناردو دا ءۆينچيدىڭ «La Bella Principessa» كارتيناسىن قازاقستانعا اكەلۋگە كومەكتەسكەن دەمەۋشىلەردىڭ ءبىرى بولعانىمىزدى ماقتان تۇتامىز. يتاليانىڭ قازاقستانداعى ەلشىسى البەرتي مىرزا وتكەن قىركۇيەكتە بۇل يدەيامەن بولىسكەن ەدى. ءبىز ForteBank اتىنان بۇل ۇسىنىستى ەستىگەن بويدا قولدادىق. كوپتەگەن جىلدار بويى ءبىز مادەنيەت، ونەر جوبالارىن قولداپ كەلەمىز. 2006 جىلدان باستاپ ءبىزدىڭ استاناداعى باس كەڭسەمىزدە Kulanshi Art Space كورمەسى جۇمىس ىستەپ كەلەدى. وسى جىلدار ىشىندە گالەرەيادا قازاقستاندىق جانە شەتەلدىك سۋرەتشىلەردىڭ جۇمىستارى قويىلدى. دەڭگەيى بيىك «La Bella Principessa» كارتيناسىن ەلگە اكەلۋ وڭاي بولمادى. لەوناردو دا ۆينچي ءوز زامانىنىڭ گەنيى" - دەدى، ءباسپاسوز ءماسليحاتى بارىسىندا ForteBank باسقارۋشى ديرەكتورى ءاليا ەسجان.
La Bella Principessa — 15 عاسىردىڭ اياعىندا لەوناردو دا ۆينچي سالعان يتالياندىق اقسۇيەكتەرگە جاتاتىن جاس قىزدىڭ پورترەتى. جوعالىپ كەتىپ، قايتا تابىلعان تۋىندى شەبەردىڭ ەڭ جۇمباق ءارى تارتىمدى تۋىندىلارىنىڭ ءبىرى. بۇعان دەيىن كارتينا الەم بويىنشا بەس رەت قانا قويىلىپ، كوپشىلىكتىڭ ۇلكەن قىزىعۋشىلىعىن تۋدىرعان ەدى.
ۇيىمداستىرۋشىلار بارلىق ەلوردا تۇرعىندارى مەن قوناقتارىن لەوناردو دا ءۆينچيدىڭ سيرەك تۋىندىسىن باعالاۋ ءۇشىن كورمەگە شاقىرادى.
