Prezıdent Qasym-Jomart Toqaev Ulttyq mýzeıdegi óner týyndylary kórmesin tamashalady dep habarlady, Memleket basshysynyń baspasóz-qyzmeti.
Prezıdentke ónertanýshy Olga Batýrına qazaqstandyq talantty qylqalam sheberleriniń týyndylary jınaqtalǵan «Dala keskindemesi: rámizder, boıaýlar, beıneler» atty kórmeni tanystyrdy.
Onyń aıasynda Qasym-Jomart Toqaev áıgili ıtalııalyq sýretshi Leonardo da Vınchıdiń «Ádemi hanshaıym» (La bella principessa) kartınasynyń túpnusqasyn da kórdi. Tanymal týyndynyń kórmesi Ulttyq mýzeıdiń 10 jyldyǵyna oraı Italııanyń «Scripta Maneant» baspasymen birlese uıymdastyrylǵan. Joǵary Renessans dáýirine jatatyn bul qundy jádiger Eýropadan tysqary jerge alǵash ret shyǵarylyp otyr.
Kórme elimizdiń Mádenıet jáne aqparat mınıstrliginiń, Italııanyń Qazaqstandaǵy elshiliginiń jáne Italııa mádenıet ınstıtýtynyń qoldaýymen ótip jatyr.
Elorda turǵyndary men qonaqtary Leonardo da Vınchıdiń osynaý biregeı týyndysyn 4 tamyzǵa deıin tamashalaı alady.
Kórmeniń bizde ótýine ForteBank muryndyq boldy.
«ForteBank atynan biz Leonardo Da Vınchıdiń «La Bella Principessa» kartınasyn Qazaqstanǵa ákelýge kómektesken demeýshilerdiń biri bolǵanymyzdy maqtan tutamyz. Italııanyń Qazaqstandaǵy elshisi Albertı myrza ótken qyrkúıekte bul ıdeıamen bólisken edi. Biz ForteBank atynan bul usynysty estigen boıda qoldadyq. Kóptegen jyldar boıy biz mádenıet, óner jobalaryn qoldap kelemiz. 2006 jyldan bastap bizdiń Astanadaǵy bas keńsemizde Kulanshi Art Space kórmesi jumys istep keledi. Osy jyldar ishinde galereıada qazaqstandyq jáne sheteldik sýretshilerdiń jumystary qoıyldy. Deńgeıi bıik «La Bella Principessa» kartınasyn elge ákelý ońaı bolmady. Leonardo da Vınchı óz zamanynyń genııi" - dedi, baspasóz máslıhaty barysynda ForteBank basqarýshy dırektory Álııa Esjan.
La Bella Principessa — 15 ǵasyrdyń aıaǵynda Leonardo da Vınchı salǵan ıtalıandyq aqsúıekterge jatatyn jas qyzdyń portreti. Joǵalyp ketip, qaıta tabylǵan týyndy sheberdiń eń jumbaq ári tartymdy týyndylarynyń biri. Buǵan deıin kartına álem boıynsha bes ret qana qoıylyp, kópshiliktiń úlken qyzyǵýshylyǵyn týdyrǵan edi.
Uıymdastyrýshylar barlyq elorda turǵyndary men qonaqtaryn Leonardo da Vınchıdiń sırek týyndysyn baǵalaý úshin kórmege shaqyrady.
