بۇگىن قازاقستان رەسپۋبليكاسىنىڭ ۇكىمەت ۇيىندە 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ۇيىمداستىرۋ كوميتەتى مەن Halyk Bank اراسىنداعى ىنتىماقتاستىق تۋرالى كەلىسىمگە قول قويىلدى.
ىنتىماقتاستىق تۋرالى كەلىسىمگە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى، 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ۇيىمداستىرۋ كوميتەتىنىڭ توراعاسى رومان سكليار جانە Hayk Bank اق باسقارما ءتورايىمى ءۇمىت شاياحمەتوۆا قول قويدى. قول قويۋ راسىمىنە تۋريزم جانە سپورت ۆيتسە-ءمينيسترى سەرىك جاراسباەۆ، 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسى نايل نۇروۆ قاتىستى.
بۇل كەلىسىم 5-ءشى دۇنيەجۇزىلىك كوشپەندىلەر ويىندارىنىڭ ماڭىزدىلىعىن ارتتىرىپ، مەملەكەت پەن بيزنەس اراسىنداعى ارىپتەستىكتى نىعايتا تۇسەدى. باس سەرىكتەس رەتىندە Halyk Bank 8-13 قىركۇيەك ارالىعىندا استانادا وتەتىن كوشپەندىلەر ويىندارىن ۇيىمداستىرۋ ىسىنە ايتارلىقتاي قولداۋ كورسەتەدى.
ءوز سوزىندە رومان سكليار قازاقستاننىڭ تاريحي تۇرعىدا ءداستۇرلى كوشپەلى مادەنيەتتىڭ ساقتاۋشىسى ەكەنىنە ەرەكشە ءمان بەرىپ، «مەملەكەت باسشىسى قاسىم-جومارت كەمەلۇلى توقاەۆ كوشپەلى وركەنيەتتىڭ مۇراسىن حالقىمىزدىڭ باستى برەندتەرىنىڭ ءبىرى دەپ اتادى. بۇل مۇرانى ءبىز استاناداعى ويىندار كەزىندە جاھاندىق دەڭگەيدە تانىتۋىمىز كەرەك»،- دەپ مالىمدەدى.
رومان سكلياردىڭ پىكىرىنشە، 5-ءشى دۇنيەجۇزىلىك كوشپەندىلەر ويىندارىنىڭ باس سەرىكتەسى رەتىندە قازاقستاننىڭ قارجى سالاسىنىڭ كوشباسشىسى – Halyk Bank-ءتىڭ تاڭدالۋى تولىقتاي ورىندى. بانك قارجىلىق قىزمەت كورسەتۋشى عانا ەس، سونىمەن قاتار بۇكىل رەسپۋبليكا بويىنشا الەۋمەتتىك جوبالاردى بەلسەندى تۇردە ىسكە اسىرىپ وتىرعان اسا جاۋاپتى مەكەمە.
ءوز تاراپىنان Halyk Bank باسشىسى ءۇمىت شاياحمەتوۆا مۇنداي جوعارى دەڭگەيدەگى ماڭىزدى حالىقارالىق جوباعا قولداۋ كورسەتۋ بانك ءۇشىن ۇلكەن مارتەبە ءارى اسقان جاۋاپكەرشىلىك ەكەنىن ايتا كەلە، «ءبىز، 5-ءشى دۇنيەجۇزىلىك كوشپەندىلەر ويىندارىن وتكىزۋ ەلىمىزدىڭ الەمدىك قاۋىمداستىق الدىنداعى ابىرويىن ارتتىرۋداعى ايتارلىقتاي قادام دەپ ەسەپتەيمىز. بۇل ورتاق مۇرامىز بەن مادەني كودىمىزدى ساقتاۋدىڭ ماڭىزدىلىعىن دارىپتەۋگە باعىتتالعان، جۇزدەن استام مەملەكەت وكىلدەرى قاتىساتىن حالىقارالىق جوبا. ءبىز بانك رەتىندە ەلدىڭ دامۋى مەن قازاقستان حالقىنىڭ يگىلىگىنە باعىتتالعان ىستەردى ارقاشان قولدايمىز»، - دەپ اتاپ ءوتتى.
5-ءشى دۇنيەجۇزىلىك كوشپەندىلەر ويىندارى استانادا 8-13 قىركۇيەك ارالىعىندا وتەدى. 21 سپورت ءتۇرىن قامتىعان دودالى جارىسقا الەمنىڭ 85 ەلىنەن 2000-نان اسا سپورتشى قاتىسادى.
