ءماجىلىس 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالاتىن زاڭ قابىلدادى، دەپ حابارلايدى “ادىرنا” ۇلتتىق پورتالى.
«ەنەرگەتيكالىق سۋسىندار الكوگولدەن دە قاۋىپتى بولىپ وتىر. قازىر ون جاسار بالا دا ەنەرگەتيكالىق سۋسىندى وڭاي ساتىپ الا الادى. وسىعان بايلانىستى مەملەكەت باسشىسىنىڭ تاپسىرماسىن ورىنداۋ ماقساتىندا 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالىندى»، - دەدى دەپۋتات ەلنۇر بەيسەنباەۆ سارسەنبى كۇنى ءماجىلىس وتىرىسىندا.
جاڭا ەرەجە ءماجىلىستىڭ ەكىنشى وقىلىمىندا ماقۇلدانعان «كەيبىر زاڭنامالىق اكتىلەرگە ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا ەنگىزىلدى.
ەندى قازاقستاندا لوتەرەيا بيلەتتەرىن، ونىڭ ىشىندە ەلەكتروندى بيلەتتەردى تەك لوتەرەيا وپەراتورى مەن اگەنتى ارقىلى ساتۋعا رۇقسات ەتىلگەن. ولاردى ساتۋعا لوتەرەيا تەرمينالدارى، ستاتسيونارلىق ەمەس ساۋدا وبەكتىلەرى، پوشتا وپەراتورىنىڭ پوشتا بايلانىسى فيليالدارى جانە لوتەرەيا وپەراتورىنىڭ فيليالدارى ارقىلى رۇقسات ەتىلەدى.
تۇرعىن ۇيلەر مەن جاتاقحانالاردا، مادەنيەت ۇيىمدارى ورنالاسقان جەكەلەگەن عيماراتتار مەن قۇرىلىستاردا، ءبىلىم بەرۋ جانە دەنساۋلىق ساقتاۋ ۇيىمدارىندا، ءدىني عيماراتتار مەن قۇرىلىستاردا لوتەرەيا بيلەتتەرىن تاراتۋعا جانە تەرمينالدار ورناتۋعا تىيىم سالىنادى.
