قازاقستاندا بۋكمەكەرلىك كەڭسەلەر مەن بۋكمەكەرلىك ورتالىقتاردىڭ عيماراتتارداعى، قۇرىلىستارداعى جانە كولىك قۇرالدارىنداعى سىرتقى جارناماسىنا، سونداي-اق ولاردى بۇقارالىق اقپارات قۇرالدارىندا، كينو، بەينە جانە انىقتامالىق قىزمەتتەردە جارنامالاۋعا تولىق تىيىم سالىندى، دەپ حابارلايدى “ادىرنا” ۇلتتىق پورتالى.
اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن ىلەسپە تۇزەتۋلەرىمەن ەكىنشى وقىلىمدا قابىلدادى.
“دەگەنمەن بۋكمەكەرلىك كەڭسەلەر مەن بۋكمەكەرلىك دۇكەندەردىڭ ورنالاسقان جەرىندە، سپورت عيماراتتارىنىڭ ىشىندە، سپورتشىلاردىڭ جابدىقتارىندا، سپورتتىق تەلە-راديو ارنالاردا، سپورتتىق ءىس-شارالاردى كورسەتۋگە مامانداندىرىلعان ينتەرنەت-رەسۋرستاردا جارناماعا رۇقسات ەتىلەدى. بۇل رەتتە وتاندىق تەلەارنالار حالىقارالىق سپورت جارىستارىن تىكەلەي ترانسلياتسيالاۋ كەزىندە بۋكمەكەرلىك كەڭسەلەر مەن ۇتىس ويىنىن جارنامالاي الادى”، - دەدى ءماجىلىس دەپۋتاتى ەلنۇر بەيسەنباەۆ.
سونىمەن قاتار تۇزەتۋلەردە ۇيالى بايلانىس وپەراتورلارىنا ەلەكتروندى كازينولار، ونلاين-كازينولار، سونداي-اق حالىقتىڭ ابونەنتتىك قۇرىلعىلارىنا قۇمار ويىندار مەن ءباس تىگۋلەر تۋرالى جارنامانى قامتيتىن ماتىندىك حابارلامالار جىبەرۋگە تىيىم سالۋ كوزدەلگەن.
دەپۋتاتتىڭ سوزىنشە، جاڭا زاڭدا لوتەرەيا بيلەتتەرىن تاراتۋ ەرەجەلەرى بەلگىلەندى.
“لوتەرەيا بيلەتتەرىن، ونىڭ ىشىندە ەلەكتروندى بيلەتتەردى تەك لوتەرەيا وپەراتورى مەن اگەنتى ارقىلى تاراتۋعا بولادى. ولاردى ساتۋعا لوتەرەيا تەرمينالدارى، ستاتسيونارلىق ەمەس ساۋدا وبەكتىلەرى، پوشتا وپەراتورىنىڭ پوشتا بايلانىسى فيليالدارى جانە لوتەرەيا وپەراتورىنىڭ فيليالدارى ارقىلى رۇقسات ەتىلەدى. بۇل رەتتە تۇرعىن ۇيلەر مەن جاتاقحانالاردا، مادەنيەت ۇيىمدارى ورنالاسقان جەكەلەگەن عيماراتتار مەن قۇرىلىستاردا، ءبىلىم بەرۋ جانە دەنساۋلىق ساقتاۋ ۇيىمدارىندا، ءدىني عيماراتتار مەن قۇرىلىستاردا لوتەرەيا بيلەتتەرىن تاراتۋعا جانە تەرمينالدار ورناتۋعا تىيىم سالىنادى”، - دەدى ماجىلىسمەن.
