كەرى بايلانىس
+7 707 676 6977
adyrnaportal@gmail.com

ەندى ماگيستراتۋرانىڭ شەكتى بالى تومەندەتىلمەك

2021
Adyrna.kz Telegram

ۇلتتىق ۋنيۆەرسيتتەردىڭ رەكتورلارى بۇدان بىلاي كونكۋرستىق نەگىزدە تاڭدالادى. الماتى – الەمدەگى ەڭ قاۋىپتى ەلدەردىڭ تىزىمىندە. بۇل تۋرالى informburo.kz حابارلايدى.

قازاقستاندىقتاردىڭ ۇشتەن ءبىرى بيلىكتەن وزگەرىستەر كۇتەدى

Demoscope قوعامدىق پىكىرگە جەدەل مونيتورينگ جۇرگىزۋ بيۋروسى قازاقستان ازاماتتارى اراسىندا 9-شى ماۋسىمدا وتكەن پرەزيدەنت سايلاۋىنا قاتىستى ساۋالناما جۇرگىزىپتى. وعان ەلدەگى 14 وبلىس پەن رەسپۋبليكالىق ماڭىزى بار قالالاردا (نۇر-سۇلتان، الماتى، شىمكەنت) تۇراتىن 1100 ادام قاتىسقان. ولاردىڭ 49%-ى ساياسي حابارلارعا اندا-ساندا كوز سالسا، ۇشتەن ءبىرى ونى ءمۇلت جىبەرمەيتىنى بەلگىلى بولعان.

حالىقتىڭ بەستەن ءبىرى عانا ەلدە بولىپ جاتقان وقيعالارعا بەي-جاي قارايدى ەكەن. رەسپوندەنتتەردىڭ 67%-ى سايلاۋعا قاتىستىم دەپ جاۋاپ بەرگەن. سۇرالعانداردىڭ جارتىسى (53%) ق.توقاەۆ قىزمەتىنە رەسمي تۇردە كىرىسكەننەن كەيىن ەلدەگى جاعداي جاقسارادى دەپ ءۇمىتتى. ۇشتەن ءبىرىنىڭ (28%) بولجامىنشا، بارلىعى سول قالپىندا قالادى. قازاقستاندىقتاردىڭ باسىم بولىگى ءۇشىن ەلدەگى تۇراقتىلىق اسا ماڭىزدى. ازاماتتاردىڭ ۇشتەن ءبىرى (33%) بيلىكتەن وڭ وزگەرىستەر كۇتەدى.

ساۋالناماعا جاۋاپ بەرگەندەردىڭ اراسىندا 18-24 ارالىعىنداعى جاستار اراسىندا نارازىلىق نىشاندارى بايقالادى. باسقا توپتارعا قاراعاندا، وسى جاستار وزگەرىستەردىڭ بولعانىن قاتتى قالايدى ەكەن (48%). 55 پەن 64 جاس اراسىنداعى قاتىسۋشىلارعا ەلدەگى تۇراقتىلىق ماڭىزدى.

46 مىڭ استانالىق مەديتسينالىق ساقتاندىرۋ جۇيەسىنەن تىس قالعان

باس قالاداعى №2 كوپبەيىندى اۋرۋحانانىڭ باس دارىگەرى يۆان ءليدىڭ ايتۋىنشا، ولاردىڭ ءبارى ءوزىن-ءوزى جۇمىسپەن قامتىعان ازاماتتار.

- قىسقا ۋاقىتتا حالىقتىڭ وسى توبىنىڭ ستاتۋسىن انىقتاماساق، 2020 جىلدان باستاپ الەۋمەتتىك داۋ-داماي تۋىنداۋ قاۋپى بار، – دەيدى ي.لي.

باس دارىگەر بۇقارانىڭ باسىم بولىگىنىڭ كەلەر جىلى وزدەرىن نە كۇتىم تۇرعانىنان بەيحابار ەكەنىن ايتادى.

ادام قۇقىقتارى جونىندەگى ۋاكىل ءبىلىم مينيسترىنە ۇندەۋ جاريالادى

قر ومبۋدسمەنى ا.شاكىروۆتىڭ ايتۋىنشا، بالالاردى التى جاستان مەكتەپكە قابىلداۋ جۇزەگە اسىرۋ ماڭىزدى پايىمداۋدى تالاپ ەتەدى. سونىڭ ىشىندە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 127-بابىنا سايكەس ونى ورىنداماۋ ايىپپۇلدان اكىمشىلىك قاماۋعا دەيىن جازاعا اكەپ سوعادى.

- كەلىپ تۇسكەن وتىنىشتەردى تالداۋ ناتيجەسىندە، كوپتەگەن ازامات ءۇشىن بۇل جاڭالىق فورس-ماجورلىق جاعداي بولىپ تابىلاتىن اتاپ ءوتۋ قاجەت. ويتكەنى جاڭا نورمانىڭ كۇشىنە ەنۋى 2016 جىلدىڭ ءساۋىر ايىندا زاڭ جۇزىندە قاراستىرىلعانىنا قاراماستان، قاجەتتى اقپاراتتىق-دايىندىق جانە تاجىريبەلىك سۇيەمەلدەۋ جۇرگىزىلمەگەن،- دەلىنگەن ومبۋدسمەننىڭ ءباسپاسوز قىزمەتى تاراتقان حابارلامادا.

ادام قۇقىقتارى جونىندەگى ۋاكىل وتكەن جىلى ەلىمىزدىڭ مەكتەپتەرىندە ءبىر سىنىپقا 25 وقۋشىدان كوپ بالا قابىلدانعانىن اتاپ ءوتتى. ول مۇنىڭ زاڭبۇزۋشىلىق ەكەنىن، بيىل دا وسى جاعداي قايتالانىپ، ءۇش اۋىسىمدى مەكتەپتەر سانى كوبەيۋ قاۋپى بارىن ايتادى. بۇل تۇرعىدا ومبۋدسمەن ۇندەۋحاتىنىڭ سوڭىندا ۋاكىلەتتى ورگانعا جاعىمدى باستامانى ىسكە اسىرۋ كەزىندە جاعىمسىز سالدارلاردى بولدىرماۋ شارالارىن قابىلداۋ ماقساتىندا قالىپتاسىپ جاتقان جاعدايدى جان-جاقتى تالداۋدى ۇسىندى.

ۇلتتىق ۋنيۆەرسيتتەردىڭ رەكتورلارى بۇدان بىلاي كونكۋرستىق نەگىزدە تاڭدالادى

بۇل تۋرالى پرەزيدەنت ق.توقاەۆ ءوزىنىڭ Twitter-دەگى پاراقشاسىندا جازدى.

"قر ءبىلىم جانە عىلىم ءمينيسترى اسحات ايماعامبەتوۆكە ۇلتتىق ۋنيۆەرسيتەتتەردىڭ رەكتورلارىن كونكۋرستىق نەگىزدە ۇكىمەت قاۋلىسىمەن تاعايىنداۋ جونىندە نورماتيۆتىك قۇجاتتار ازىرلەۋدى تاپسىردىم. قازىرگى رەكتورلاردى پرەزيدەنت جارلىعىمەن تاعايىنداۋ پروتسەدۋراسى كۇشىن جويادى" دەلىنگەن مەملەكەت باسشىسىنىڭ جازباسىندا.

الماتىنىڭ اۋداندىق اكىمدىكتەرى مۇگەدەكتەردى جۇمىسپەن قامتۋعا بولىنگەن قاراجاتتاردى يگەرمەگەن

"الەۋمەتتىك قىزمەتكەرلەر، مۇگەدەكتەر جانە ەرىكتىلەر اسسوتسياتسياسى" قوعامدىق بىرلەستىگىنىڭ پرەزيدەنتى گۇلنۇر حاكىمجانوۆانىڭ ايتۋىنشا، 2018 جىلى مۇمكىندىگى شەكتەۋلى جاندارعا 770 جۇمىس ورنىن اشۋ ءۇشىن 105 ملن تەڭگە بولىنگەن. الايدا اكىمدىكتەر بۇل قارجىنىڭ 24 ملن يگەرىپ، جوسپارلى كورسەتكىشتىڭ 13%-ىن عانا ورىنداعان. بىرلەستىك باسشىسى اتقارۋشى ورگانداردىڭ باعدارلامانى جۇزەگە اسىرماي وتىرعانىمەن بىرگە، ونى ورىنداۋعا جاۋاپتى ەمەستىگىن العا تارتتى. بۇل رەتتە كاسىپكەرلەردىڭ مۇگەدەكتەردى جۇمىسقا تۇرعىزۋعا قۇلىقسىزدىعى دا ايتىلدى.

ەۋرازيا ەكونوميكالىق وداعىنا مۇشە ەلدەر ۆاليۋتا باعامىنىڭ ساياساتىن ۇيلەستىرۋ جونىندە كەڭەس قۇرادى

وداققا مۇشە ەلدەردىڭ باعام ساياساتى جونىندەگى كەڭەسى تۋرالى كەلىسىم جوباسىن ەۋرازيا ەكونوميكالىق كوميسسياسى ماقۇلدادى. قۇجات وداق تۋرالى كەلىسىم-شارت شارتتارى نەگىزىندە ازىرلەنگەن.

وندا باعام ساياساتىن قۇرامىنا وداققا مۇشە ەلدەردىڭ ۇلتتىق بانك توراعالارى كىرەتىن بولەك ورگان ۇيلەستىرەتىنى نىقتاپ جازىلعان.

ماگيستراتۋراعا گرانتقا ءتۇسۋ ءۇشىن كەشەندى تەستىلەۋدىڭ شەكتى بالى تومەندەتىلۋى مۇمكىن

ءبىلىم جانە عىلىم مينيسترلىگى وسىنداي ۇسىنىس تاستادى. قاۋلى جوباسى تالقىلاۋ ءۇشىن اشىق ۇكىمەت پورتالىنا جاريالاندى.
ۇسىنىلعان وزگەرىستەرگە سايكەس، بولاشاق ماگيسترانتتار كونكۋرسقا قاتىسۋ ءۇشىن قازاق جانە ورىس تىلدەرىندە وقيتىن ماگيستراتۋرا ءۇشىن كەشەندى تەستىلەۋدەن 75 بالل الۋ (بۇرىن 100 بالل), اعىلشىن تىلىندەگى ماگيستراتۋراعا 50 بالل (بۇرىن 60 بالل) الۋ جەتكىلىكتى.

قازاقستان مەن وزبەكستاندى جالعايتىن "بەينەۋ – اقجىگىت – وزبەكستان شەكاراسى" اۆتوجولى اشىلدى

ۇزىندىعى 85 شاقىرىمدى قۇرايتىن كولىك ءدالىزى قازاقستان مەن وزبەكستاننىڭ ترانزيتتىك الەۋەتىنىڭ ارتىپ، اراداعى ساۋدا اينالىمىنىڭ وسۋىنە ىقپال ەتپەك. سالتاناتتى شاراعا ەكى ەلدىڭ پرەمەر-مينيسترلەرى اسقار مامين مەن ابدۋللا ءارىپوۆ قاتىسىپ، جوبانىڭ ءساتتى اياقتالۋىمەن قۇتتىقتادى. جاڭا جول – ورتالىق ازيا ەلدەرى تاۋارلارىن رەسەي مەن كاۆكازعا، ودان ءارى قاراي ەۋروپاعا كەدەرگىسىز جەتكىزۋگە مۇمكىندىك بەرەتىن ەڭ قىسقا جول بولىپ وتىر. جولدى جوندەۋ جۇمىستارى 2017 جىلى شىلدەدە باستالعان. قۇنى 19,8 ملرد تۇراتىن جوباعا "تەمىرجول جوندەۋ" جشس مەردىگەر بولدى. قارجىلاندىرۋ رەسپۋبليكالىق بيۋدجەتتەن جۇزەگە اسىرىلعان.
"ادىرنا" ۇلتتىق پورتالى
پىكىرلەر