قايعىلى وقيعا ۇزىناعاش اۋىلىنىڭ تۇسىندا ورىن العان. مارقۇم ايەلدىڭ تۋىستارى كۇننىڭ ىستىعىنا شىداماعان جۇرگىزۋشى اۆتوبۋستىڭ ەسىگىن اشىپ، قاۋىپسىزدىك ەرەجەسىن ساقتاماعان دەيدى. ال جامبىل اۋدانىنىڭ تۇرعىندارى بولسا ابدەن ەسكىرگەن، قاپىرىق، كىر اۆتوبۋستاردان شارشاعاندارىن ايتتى. اجالى جول ۇستىندە كەلگەن ايەل تۋىستارىن ساعىنىپ، موڭعوليانىڭ بايان-ولگەيىنەن قوناققا قىدىرىپ كەلگەن ەكەن، دەپ حابارلايدى "adyrna.kz" ءتىلشىسى Tengrinews.kz سايتىنا سىلتەمە جاساپ.
مارقۇم، 47 جاستاعى جايناگۇل حالىق تۋعان جەرىنەن تاريحي وتانىنا قىدىرىپ كەلسە كەرەك. ەكى كۇننەن سوڭ ەلىنە قايتاتىن بولعان سوڭ ول الماتىنىڭ مەتروسىن، قالانىڭ كورىكتى جەرلەرىن ارالاۋعا شىققان. تۋىستارىمەن بىرگە «التىن وردا» بازارىنان اۆتوبۋسقا وتىرعان ول ۇمبەتالى اۋىلىنىڭ تۇسىنان ءتۇسۋ كەرەك ەكەن. بىراق الماتىنى بىلمەگەندىكتەن مەجەلى جەردەن ءوتىپ كەتكەن جايناگۇل كەنەت اۆتوبۋس ۇزىناعاش اۋىلىنا قاراي بۇرىلعان ساتتە اشىق تۇرعان ەسىكتەن سىرتقا ۇشىپ كەتكەن. ەت-جاقىندارىنىڭ ايتۋىنشا، كولىكتى باياۋ جۇرگەن، بىراق سوعان قاراماستان جايناگۇل تاس جولعا باسىمەن قۇلاپ، ەسىن جيماعان كۇيى كەتكەن. الماتى وبلىستىق پوليتسيا دەپارتامەنتىنىڭ رەسمي وكىلى اتالعان جايتقا بايلانىستى قازاقستان رەسپۋبليكاسىنىڭ قىلمىستى كودەكسىنىڭ 345 بابىنىڭ 3-تارماعىمەن سوتقا دەيىنگى تەرگەپ-تەكسەرۋدىڭ ءجۇرىپ جاتقانىن جاريالادى. ساراپتامادان سوڭ پروتسەسسۋالدىق شەشىم قابىلداندى. جولاۋشى قازا بولسا دا اۆتوبۋس كۇندەلىكتى باعىتىدا جولاۋشى تاسۋدى ءالى جالعاستىرىپ جاتىر. تەك رولگە ەكىنشى اۋىسىمداعى ادام وتىرعان. "اۆتوبۋستا ادامدارعا ەشقانداي جاعداي جاسالماعان. بالامەن وسىنداي ىستىقتا اۆتوبۋستا كەتىپ بارا جاتىرمىز. اركىم ءوز قالتاسىن ويلايتىن بولدى عوي. ەشكىم ەشتەڭە ىستەپ جاتقان جوق", – دەيدى ءبىر جولاۋشى. قاسكەلەڭ قالالىق اۆتوپاركىنە قارايتىن اۆتوبۋستىڭ زاۋىتتان شىققانىنا 32 جىل بولعان. ەسكى كولىك بۇگىندە الماتى-ۇزىناعاش-وتار باعىتىندا ءجۇرىپ، پارككە كۇن سايىن 14 مىڭ تەڭگە وتكىزەدى ەكەن. ال الماتى-ۇزىناعاش اراسىندا قاتىنايتىن 20 شاقتى اۆتوبۋستىڭ بارلىعىنىڭ توزىعى جەتكەن. "اۆتوپاركتىڭ اۆتوبۋستارى ەسكىرگەن. "قاسكەلەڭ اۆتوپارك" جاۋاپكەرشىلى شەكتەۋلى سەرىكتەستىگى باسشىلىعىنا وسىلاردى ايتىپ، حات جازعانبىز", - دەدى الماتى وبلىسى جامبىل اۋدانى جولاۋشىلار كولىگى جانە اۆتوموبيل جولدارى ءبولىمىنىڭ باس مامانى سالاۋات يبراگيموۆ. ال ابايسىزدا جولاۋشىسىنان ايىرىلعان جۇرگىزۋشى جەرلەۋگە جىلقى اپارىپ، كومەك كورسەتەمىز دەگەن جەلەۋمەن مارقۇمنىڭ تۋىستارىنان "كەشىردىك" دەگەن قولحات تا الىپ ۇلگەرگەن. قىدىرىپ كەپ، تاريحي وتانىنان ماڭگىلىك ورىن تاپقان مارقۇمنىڭ ارتىندا ەكى ۇلى قالدى. ال قىستا جىلۋى، جازدا جەلدەتكىشى جوق ەسكى اۆتوبۋستاردىڭ قاشان جاڭارارى بەلگىسىز.
"ادىرنا" ۇلتتىق پورتالى
