Qaiǧyly oqiǧa Ūzynaǧaş auylynyŋ tūsynda oryn alǧan. Marqūm äieldıŋ tuystary künnıŋ ystyǧyna şydamaǧan jürgızuşı avtobustyŋ esıgın aşyp, qauıpsızdık erejesın saqtamaǧan deidı. Al Jambyl audanynyŋ tūrǧyndary bolsa äbden eskırgen, qapyryq, kır avtobustardan şarşaǧandaryn aitty. Ajaly jol üstınde kelgen äiel tuystaryn saǧynyp, Moŋǧoliianyŋ Baian-Ölgeiınen qonaqqa qydyryp kelgen eken, dep habarlaidy "adyrna.kz" tılşısı Tengrinews.kz saityna sılteme jasap.
Marqūm, 47 jastaǧy Jainagül Halyq tuǧan jerınen tarihi otanyna qydyryp kelse kerek. Ekı künnen soŋ elıne qaitatyn bolǧan soŋ ol Almatynyŋ metrosyn, qalanyŋ körıktı jerlerın aralauǧa şyqqan. Tuystarymen bırge «Altyn Orda» bazarynan avtobusqa otyrǧan ol Ümbetälı auylynyŋ tūsynan tüsu kerek eken. Bıraq Almatyny bılmegendıkten mejelı jerden ötıp ketken Jainagül kenet avtobus Ūzynaǧaş auylyna qarai būrylǧan sätte aşyq tūrǧan esıkten syrtqa ūşyp ketken. Et-jaqyndarynyŋ aituynşa, kölıktı baiau jürgen, bıraq soǧan qaramastan Jainagül tas jolǧa basymen qūlap, esın jimaǧan küiı ketken. Almaty oblystyq Polisiia Departamentınıŋ resmi ökılı atalǧan jaitqa bailanysty Qazaqstan Respublikasynyŋ Qylmysty kodeksınıŋ 345 babynyŋ 3-tarmaǧymen sotqa deiıngı tergep-tekserudıŋ jürıp jatqanyn jariialady. Saraptamadan soŋ prosessualdyq şeşım qabyldandy. Jolauşy qaza bolsa da avtobus kündelıktı baǧytyda jolauşy tasudy älı jalǧastyryp jatyr. Tek rölge ekınşı auysymdaǧy adam otyrǧan. "Avtobusta adamdarǧa eşqandai jaǧdai jasalmaǧan. Balamen osyndai ystyqta avtobusta ketıp bara jatyrmyz. Ärkım öz qaltasyn oilaityn boldy ǧoi. Eşkım eşteŋe ıstep jatqan joq", – deidı bır jolauşy. Qaskeleŋ qalalyq avtoparkıne qaraityn avtobustyŋ zauyttan şyqqanyna 32 jyl bolǧan. Eskı kölık bügınde Almaty-Ūzynaǧaş-Otar baǧytynda jürıp, parkke kün saiyn 14 myŋ teŋge ötkızedı eken. Al Almaty-Ūzynaǧaş arasynda qatynaityn 20 şaqty avtobustyŋ barlyǧynyŋ tozyǧy jetken. "Avtoparktıŋ avtobustary eskırgen. "Qaskeleŋ avtopark" jauapkerşılı şekteulı serıktestıgı basşylyǧyna osylardy aityp, hat jazǧanbyz", - dedı Almaty oblysy Jambyl audany jolauşylar kölıgı jäne avtomobil joldary bölımınıŋ bas mamany Salauat İbragimov. Al abaisyzda jolauşysynan aiyrylǧan jürgızuşı jerleuge jylqy aparyp, kömek körsetemız degen jeleumen marqūmnyŋ tuystarynan "keşırdık" degen qolhat ta alyp ülgergen. Qydyryp kep, tarihi otanynan mäŋgılık oryn tapqan marqūmnyŋ artynda ekı ūly qaldy. Al qysta jyluy, jazda jeldetkışı joq eskı avtobustardyŋ qaşan jaŋarary belgısız.
"Adyrna" ūlttyq portaly
