وبلىس اكىمى ناريمان تورەعاليەۆ قاراتوبە اۋدانىنا جۇمىس ساپارى اياسىندا ساۋلە اۋىلىندا سالىنعان جاڭا شاعىن جيناقتى ءبىلىم ورداسىنىڭ اشىلۋ راسىمىنە قاتىستى. ايماق باسشىسى ەلدى مەكەن تۇرعىندارىن ايتۋلى قۋانىشپەن قۇتتىقتاپ، جاقسىباي نەگىزگى ورتا مەكتەبىنىڭ سۋ جاڭا عيماراتى جاس ۇرپاققا بەرىلەتىن ءبىلىم ساپاسىن جاڭا دەڭگەيگە كوتەرەتىنىنە سەنىم ءبىلدىردى.
- كەيىنگى 3 جىلدا وڭىردە 30 مەكتەپ جاڭادان سالىندى. بيىل كەزەكتى وقۋ جىلىندا وسىنداي تاعى 7 شاعىن جيناقتى مەكتەپتى پايدالانۋعا بەرگەلى وتىرمىز. ءبىلىم بەرۋ ينفراقۇرىلىمىن دامىتۋ، قالا مەن اۋىل مەكتەپتەرىندەگى ءبىلىم ساپاسىنداعى الشاقتىقتى ازايتۋ – مەملەكەت باسشىسى قاسىم-جومارت كەمەلۇلى توقاەۆتىڭ ناقتى تاپسىرماسى. بۇل جونىندە پرەزيدەنت كۇنى كەشە وتكەن تامىز كونفەرەنتسياسىنىڭ پلەنارلىق وتىرىسىندا دا ايتتى. جاس ۇرپاقتىڭ الاڭسىز ءبىلىم الۋى ءۇشىن جاعداي جاساۋ – مەملەكەتتىڭ ستراتەگيالىق مىندەتى، - دەدى ناريمان تورەعاليەۆ.
وبلىس اكىمى ەل تاريحىنداعى تۇڭعىش قۇرىلتاي سايلاۋىنا بەلسەنە قاتىسىپ، ازاماتتىق جاۋاپكەرشىلىك تانىتقانى ءۇشىن اۋىل تۇرعىندارىنا ريزاشىلىعىن جەتكىزدى. الەۋمەتتىك نىساندى ۋاقىتىلى ءارى ساپالى سالىپ بەرگەن قۇرىلىسشىلارعا العىس حات تابىس ەتتى.
جاقسىباي نەگىزگى مەكتەبى 1973 جىلى باستاۋىش مەكتەپ رەتىندە اشىلىپ، 1991 جىلى مارتەبەسى اۋىسقان. جارتى عاسىردان استام ۋاقىت پايدالانىلعان عيماراتتىڭ توزىعى جەتتى. 60 ورىنعا شاقتالعان سۋ جاڭا نىسان KPO b.v. كومپانياسىنىڭ الەۋمەتتىك مىندەتتەمەلەرى اياسىندا بوي كوتەردى.
جاڭا عيماراتتا 10 وقۋ كابينەتى بار. سونداي-اق، 2 شەبەرحانا، كىتاپحانا، اسحانا، ءماجىلىس جانە سپورت زالدارىمەن قامتاماسىز ەتىلگەن. بالالار قاۋىپسىزدىگى ءۇشىن 62 بەينەباقىلاۋ كامەراسى مەن كىرەبەرىسكە تۋرنيكەت قويىلعان. مەكتەپ اۋلاسى تولىق اباتتاندىرىلعان. سپورت جانە بالالار ويىن الاڭدارى جاساقتالعان.
سالتاناتتى ءىس-شاراعا قاتىسقان اۋىل تۇرعىندارى يگىلىكتى ىسكە ءدان ريزا ەكەنىن ايتىپ، مەملەكەت قولداۋى ءۇشىن العىس ءبىلدىردى.
ايتا كەتەيىك، جاڭا وقۋ جىلىندا نەگىزگى مەكتەپتە 69 وقۋشى ءبىلىم الادى. ولارعا 29 پەداگوگ ساباق بەرەدى.
