تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين استاناداعى ينتەرنەت ساپاسى ءۇشىن قالا تۇرعىندارىنىن كەشىرىم سۇرادى، دەپ حابارلايدى «ادىرنا» ءتىلشىسى.
«قازىر جاپپاي ورناتۋ جانە 5G تەحنولوگياسىنا كوشۋ جۇرگىزىلۋدە. بازالىق ستانتسيالار بىرەسە اندا، بىرەسە مۇندا اكەلىنەدى. جالپى پروتسەسس ءجۇرىپ جاتىر.
ارينە، سول پروتسەس كەزىندە تەحنولوگيا بولعاندىقتان قيىندىقتار تۋىنداۋى مۇمكىن. تۇرعىنداردان كەشىرىم سۇرايمىز. بۇل، مەنىڭ ويىمشا، ۋاقىتشا قۇبىلىس. ۇيالى بايلانىس وپەراتورلارى جىل سوڭىنا دەيىن ەلوردا مەن الماتىداعى جاعدايدى تۇزەتەمىز دەپ سەندىردى»،—دەدى مينيستر «digital Bridge 2023» فورۋمى اياسىندا وتكەن بريفينگتە.
سونداي-اق ول 2025 جىلدىڭ سوڭىنا دەيىن ءاربىر وبلىس ورتالىعى اۋماعىنىڭ 60 پايىزدان استامى 5G تەحنولوگياسىمەن قامتىلاتىنىن اتاپ ءوتتى.
«جوسپار بويىنشا ءبىز بيىل 700 بازالىق ستانتسيانى ورناتۋىمىز قاجەت. وپەراتورلار قازىردىڭ وزىندە بۇل كورسەتكىشتى ەڭسەردى. جىل سوڭىنا دەيىن 1 مىڭنان استام بازالىق ستانتسيا ورناتىلادى. ۇيالى بايلانىس وپەراتورلارى پرەزيدەنتتىڭ تاپسىرماسىن ورىنداپ، رەسپۋبليكالىق ماڭىزى بار قالالاردىڭ كەم دەگەندە 75 پايىزىن جانە وبلىستىڭ 60 پايىزدان استامىن 5G تەحنولوگيامەن قامتيتىنىنا تولىق سەنەمىن»،—دەپ تۇيىندەدى مۋسين.
