30 مامىردا قازاقستان رەسپۋبليكاسىنىڭ ۇلتتىق كىتاپحاناسىندا قىرعىزدىڭ حالىق جازۋشىسى، توقتوعۇل اتىنداعى مەملەكەتتىك سىيلىقتىڭ لاۋرەاتى، تۇركسوي حالىقارالىق تۇركى مادەنيەتى ۇيىمىنىڭ باس حاتشىسى سۇلتان راەۆتىڭ «كوكجال» اتتى كىتابىنىڭ تۇساۋكەسەر ءراسىمى ءوتتى.
شارانىڭ مودەراتورى – قر پرەزيدەنتى سىيلىعىنىڭ لاۋرەاتى، «قازاق راديوسى» الماتى فيليالىنىڭ باس رەداكتورى باقىت جاعىپارۇلى.
شارادا تۇركى حالىقتارى جازۋشىلار وداعىنىڭ توراعاسى ۇلىقبەك ەسداۋلەت; قر جازۋشىلار وداعى توراعاسىنىڭ ورىنباسارى نۇرجان قۋانتايۇلى; الماتى قالاسى مادەنيەت باسقارماسى توراعاسىنىڭ ورىنباسارى حالبەكوۆ ارمان بەيسەنبايۇلى; قازاقستاننىڭ ەڭبەك ەرى، دراماتۋرگ، جازۋشى دۋلات يسابەكوۆ; قازاقستاننىڭ حالىق جازۋشىسى ەلۋباي سماعۇل اباتۇلى; م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ماتىجانوۆ كەنجەحان ءىسلامجانۇلى; جازۋشى، حالىقارالىق «الاش» ادەبي سىيلىعىنىڭ يەگەرى قۋاندىق تۇمەنباي; قازاقستاننىڭ حالىق جازۋشىسى احمەتجان اشيري; “اتامۇرا” باسپاسىنىڭ ۆيتسە-پرەزيدەنتى قۇل-مۇحاممەد راحيما ابرارقىزى; اقىن، اۋدارماشى داۋلەتبەك بايتۇرسىنۇلى; «سەرپەر» جاستار سىيلىعىنىڭ لاۋرەاتى، اقىن سايات قامشىگەر جانە ت.ب. زيالى قاۋىم وكىلدەرى ءسوز سويلەپ، باۋىرلاس ەل قىرعىز بەن قازاق ادەبيەتىنىڭ تىعىز قارىم-قاتىناسى تۋرالى جىلى پىكىرلەرىن ءبىلدىردى.
«كوكجال» كىتابىنداعى شىعارمالار اۆتوردىڭ قالىپتاسقان وزىندىك قولتاڭباسى، تەرەڭ دۇنيەتانىمى، ايقىن كوزقاراسى ارقىلى ءبىزدىڭ ءداۋىرىمىزدىڭ تۇتاس پانوراماسىن بەينەلەيدى. سونداي-اق، اۆتور ءوز زامانداستارىنىڭ سان الۋان مىنەز-قۇلقى مەن جان دۇنيەسىن اشىپ، پسيحولوگيالىق، رۋحاني قىرلارىن شەبەر سۋرەتتەگەن. كىتاپ نازىك ليريزم، ىشكى دراماتيزم فيلوسوفيالىق مانەرىمەن، وقۋعا جەڭىل تىلمەن، ۇنامدى ازىلىمەن ەرەكشەلەنەدى.
كىتاپ مۇقاباسى ساياق جورتقان كوكجال قاسقىر مەن بۇگىنگى قوعامىمىزداعى ادامدار تىرشىلىگى سالىستىرا باياندالعان «كوكجال» حيكاياتىنىڭ فيلوسوفياسىنا نەگىزدەلىپ، كوركەم بەزەندىرىلگەن.
بۇعان دەيىن دە «اتامۇرا» باسپاسىنان قىرعىزدىڭ ۇلى جازۋشىسى شىڭعىس ايتماتوۆتىڭ «قىزىل الما»، «ءجاميلا»، «جانپيدا»، «اق كەمە»، «عاسىردان دا ۇزاق كۇن»، «عاسىر ايرىعىنداعى سىرلاسۋ (قۇز باسىنداعى اڭشىنىڭ زارى)» جانە ت.ب. شىعارمالار جيناعى بىرنەشە تىلدە جارىق كورگەن بولاتىن.
شارا اياسىندا «كوكجال» كىتابىنىڭ تانىستىرىلىمى جاسالىپ، اتالمىش كىتاپتىڭ 5 داناسى ۇلتتىق كىتاپحانا قورىنا سىيعا تارتتى.
شارا سوڭىندا قىرعىزدىڭ حالىق جازۋشىسى سۇلتان راەۆ اتالمىش ەڭبەگىن قازاق تىلىنە اۋدارعان قازاق اۋدارماشىلارعا، «اتامۇرا» باسپاسىنىڭ ۇجىمىنا جانە ءىس-شارانى ۇيىمداستىرعان ۇلتتىق كىتاپحانا ۇجىمىنا العىسىن ءبىلدىردى.
سونىمەن قاتار، ۇلتتىق كىتاپحانا قورىنان سۇلتان راەۆتىڭ ءومىرى مەن شىعارماشىلىعىنا ارنالعان كىتاپ كورمەسى ۇيىمداستىرىلدى.
ايتا كەتەيىك، «اتامۇرا» باسپاسى تۇركىتىلدەس حالىقتاردىڭ كوركەم شىعارمالارىن باسىپ شىعارۋمەن ءبىراز جىلدان بەرى اينالىسىپ كەلەدى. اتاپ ايتار بولساق، تۇرىكتىڭ بەلگىلى جازۋشىسى، ءازىل-سىقاقتىڭ ايگىلى شەبەرى ءازيز نەسيننىڭ «اڭگىمە وقي وتىرىڭىز»، ازەربايجاننىڭ حالىق جازۋشىسى، مەملەكەتتىك سىيلىقتىڭ يەگەرى انار رزاەۆتىڭ «بەس قاباتتى ءۇيدىڭ التىنشى قاباتى» جانە ت.ب. تۇركى ادەبيەتىندەگى تانىمال جازۋشىلاردىڭ شىعارمالارىن اۋدارىپ، جالپى وقىرمانعا ۇسىنعان بولاتىن.
وسىعان وراي «كوكجال» كىتابىنىڭ اۆتورى سۇلتان راەۆ تا ءوزى باس حاتشىلىق قىزمەتىن اتقارىپ وتىرعان تۇركى الەمىنە ورتاق تۇركسوي، ياعني تۇركى مادەنيەتىن جانە ونەرىن دامىتۋ حالىقارالىق ۇيىمى اتىنان «اتامۇرا» كورپوراتسياسىنىڭ پرەزيدەنتى، قر ەڭبەك سىڭىرگەن قايراتكەرى راقىمعالي ابرارۇلى قۇل-مۇحاممەدتى تۇركى دۇنيەسىنىڭ رۋحاني الەمىنە قوسىپ وتىرعان ۇلەسى ءۇشىن «تۇركسوي» مەدالىمەن ماراپاتتاپ، العىسىن ءبىلدىردى.
«كوكجال» كىتابىنداعى شىعارمالاردى اۋدارۋعا اتسالىسقان بەلگىلى اقىن سايات قامشىگەر دە ءسوز الىپ، اۋدارما بارىسىندا العان اسەرىن جۇرتشىلىقپەن ءبولىسىپ، ۋفا قالاسىنداعى «كيتاپ-بايرام» حالىقارالىق كىتاپ جارمەڭكەسى اياسىندا وتكەن «جىل كىتابى» كونكۋرسىنىڭ «ءبىلىم بەرۋ سالاسىنا قوسقان ۇلەسى ءۇشىن» نوميناتسياسىنىڭ جۇلدەگەرى اتانعان «اتامۇرا» باسپاسىنا بەرىلگەن ارنايى ديپلومدى تابىستادى.
