قازىرگى ۋاقىتتا ورال قالاسىندا سۋ تاسقىنى سالدارىنان سۋ باسقان ساياجايلاردى باعالاۋ جۇمىستارى ءجۇرىپ جاتىر.
ماماندار بۇگىندە 2 مىڭعا جۋىق ساياجايعا باعالاۋ جۇمىستارىن جۇرگىزگەن.
ەلىمىزدىڭ بىرقاتار وڭىرىنەن (اقتوبە، تۇركىستان، قاراعاندى، قىزىلوردا وبلىستارىنان جانە شىمكەت قالاسىنان) باعالاۋ جۇمىستارىن جۇرگىزەتىن 12 كومپانيادان 104 مامان تارتىلعان.
بۇگىندە كوپتەگەن ساياجاي ۋچاسكەلەرى ءالى دە سۋ استىندا تۇر. بىرقاتار ۋچاسكەلەردە سۋدىڭ دەڭگەيى 1 مەتردەن اسادى.
الايدا ماماندار قيىندىقتارعا قاراماستان سۋى بار ۋچاسكەلەرگە قايىقپەن بارىپ، باعالاۋدى بارىنشا جىلدام وتكىزۋدە.
باتىس قازاقستان وبلىسىنىڭ اكىمى ناريمان تورەعاليەۆ ورال قالالاسىنداعى 1-ءشى جانە 2-ءشى ساياجاي ۋچاسكەلەرىندە بولىپ، باعالاۋشى مامانداردىڭ جۇمىسىمەن تانىستى.
«مەملەكەت باسشىسى سۋ تاسقىنان زارداپ شەككەن تۇرعىندارعا جان-جاقتى قولداۋ كورسەتۋدى تاپسىرعان بولاتىن. وڭىرىمىزدە وسى باعىتتا بەلسەندى جۇمىس اتقارىلىپ جاتىر. 9671 وتباسىعا 100 اەك كولەمىندە الەۋمەتتىك كومەك كورسەتىلدى. ەندى 150 اەك كولەمىندەگى تولەمدەردى جالعاستىرۋدامىز. قازىرگى ۋاقىتتا سۋ تاسقىنىنان زارداپ شەككەن ساياجايلاردى باعالاۋ جۇمىستارى جۇرگۋزىلۋدە. باعالاۋشى كومپانيالارعا جۇمىستاردى بارىنشا جىلدام اياقتاۋدى تاپسىرامىن» - دەدى وبلىس اكىمى.
