بۇگىن، 31 مامىردا پرەزيدەنت قاسىم-جومارت توقاەۆ عالىمدارمەن كەزدەستى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
مەملەكەت باسشىسى الماتى قالاسىندا ءوتىپ جاتقان جيىندا ەلدىڭ عىلىمي الەۋەتىن دامىتۋ كەرەكتىگىن ايتتى.
«شيكىزاتقا ارقا سۇيەپ وتىرعان ەل الىسقا بارمايدى. بىزگە عالىمدار، ينجەنەرلەر، ونەرتاپقىشتار قاجەت. ماماندارىمىز الەمدىك باسەكەگە توتەپ بەرە الاتىنداي ءبىلىمدى، بىلىكتى بولۋى كەرەك.
بۇگىندە الپاۋىت ەلدەردىڭ اراسىندا بارلىق سالادا باقتالاستىق ءورشىپ تۇر. ءبىز وسى كۇردەلى كەزەڭدە ەكونوميكانىڭ جاڭا ۇلگىسىنە كوشە باستادىق. ءادىل، ينكليۋزيۆتى ءارى باسەكەگە قابىلەتتى ەكونوميكا قۇرۋعا كىرىستىك. عىلىم مەن يننوۆاتسيا ونىڭ باستى تىرەگى بولۋعا ءتيىس.
ءبىز كوشكە ىلەسەتىن ەمەس، كوشتى باستايتىن ەلدەردىڭ قاتارىندا بولۋىمىز كەرەك. ءبىر سوزبەن، عىلىمي الەۋەتىمىزدى ارتتىرۋ قاجەت. جالپى، وسى باعىتتا ءبىراز شارۋا اتقارىلىپ جاتىر. مەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا بىرقاتار ناقتى تاپسىرما بەردىم. بارلىق ماسەلە مەنىڭ تىكەلەي باقىلاۋىمدا»،—دەدى ول.
پرەزتدەنت قازىر «عىلىم جانە تەحنولوگيالىق ساياسات تۋرالى» زاڭ جوباسىنىڭ پارلامەنتتە قارالىپ جاتقانىن اتاپ ءوتتى.
«كەشە سەنات ونى ءبىرىنشى وقىلىمدا ماقۇلدادى. بۇل – وتە ماڭىزدى ءارى كوپتەن كۇتكەن قۇجات. عىلىمدى باسقارۋ جۇيەسىن جەتىلدىرۋ كەرەك. عالىمدارعا الەۋمەتتىك قولداۋ كورسەتۋ ماسەلەسى دە وتە ماڭىزدى. سوندىقتان زاڭدا عىلىمي قاۋىمداستىقتىڭ مۇددەسى بارىنشا ەسكەرىلەتىن بولادى»،—دەدى باسشى.