مەملەكەت باسشىسى قاسىم-جومارت توقاەۆ 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ح الەۋمەتتىك جەلىسىندەگى پاراقشاسىندا ارنايى جازبا جاريالادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«ءبىز جىل سايىن 31 مامىر كۇنى وتكەن عاسىرداعى ساياسي قۋعىن-سۇرگىن جانە اشارشىلىق قۇرباندارىن ەسكە الامىز.
مەملەكەتىمىز قۋعىن-سۇرگىننەن جازىقسىز جاپا شەككەن جانداردى اقتاۋ، ءتول تاريحىمىزدىڭ اقتاڭداق بەتتەرىن وبەكتيۆتى ءارى تىڭعىلىقتى زەردەلەۋ جۇمىستارىنا باسا ءمان بەرىپ وتىر.
ءبىز وتكەن زامانداعى قاسىرەتتى وقيعالاردان تاعىلىم الىپ، ونى ۇلت جادىندا ساقتاي ءبىلۋىمىز كەرەك. سوندا عانا كەز كەلگەن سىناقتان سۇرىنبەي ءوتىپ، ادىلەتتى مەملەكەت جانە وركەنيەتتى قوعام قۇرۋ جولىنداعى بيىك بەلەستەردى باعىندىرا الامىز، – دەپ جازدى پرەزيدەنت.
ايتا كەتەيىك، 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. يوسيف ستالين باسقارعان جىلدارى قازاق حالقىنىڭ زيالى قاۋىمى حالىق جاۋى بولىپ جاريالانىپ، قىسىمعا، قۋعىن-سۇرگىنگە، قاندى قىرعىنعا ۇشىرادى. وسى ساياساتتىڭ اياسىندا 100 مىڭنان استام ادام جەر اۋدارىلىپ، 25 مىڭنان استام ادام ءولىم جازاسىنا كەسىلگەن ەدى.
الەم ادەبيەتىندە «ۇلكەن تەررور» اتانعان كسرو-داعى قۋعىن-سۇرگىن كەزەڭىن قازاقستاندا دا ۇمىتۋ مۇمكىن ەمەس. 1993 جىلى قازاقستان تاۋەلسىزدىگىن جاريالاعاننان كەيىن «جاپپاي ساياسي قۋعىن-سۇرگىن قۇرباندارىن اقتاۋ تۋرالى» زاڭ قابىلداندى.
ال 1997 جىلدى تۇڭعىش پرەزيدەنت نۇرسۇلتان نازارباەۆ جالپىۇلتتىق تاتۋلىق پەن ساياسي قۋعىن-سۇرگىن قۇرباندارىن ەسكە الۋ جىلى، سونداي-اق 31 مامىردى – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى دەپ جاريالادى.
بۇل شارا – جازىقسىز جاپا شەگىپ، قازاقتى ەگەمەندى ەل ەتەمىز دەپ ەركىندىككە ۇمتىلعان ەرلەردىڭ الدىنداعى بورىشتى وتەۋگە، پارىزدى اقتاۋعا ارنالعان جۇمىستاردىڭ باستاۋى.
