Memleket basshysy Qasym-Jomart Toqaev 31 mamyr – Saıası qýǵyn-súrgin jáne asharshylyq qurbandaryn eske alý kúnine oraı H áleýmettik jelisindegi paraqshasynda arnaıy jazba jarııalady, dep habarlaıdy «Adyrna» tilshisi Aqordaǵa silteme jasap.
«Biz jyl saıyn 31 mamyr kúni ótken ǵasyrdaǵy saıası qýǵyn-súrgin jáne asharshylyq qurbandaryn eske alamyz.
Memleketimiz qýǵyn-súrginnen jazyqsyz japa shekken jandardy aqtaý, tól tarıhymyzdyń aqtańdaq betterin obektıvti ári tyńǵylyqty zerdeleý jumystaryna basa mán berip otyr.
Biz ótken zamandaǵy qasiretti oqıǵalardan taǵylym alyp, ony ult jadynda saqtaı bilýimiz kerek. Sonda ǵana kez kelgen synaqtan súrinbeı ótip, ádiletti memleket jáne órkenıetti qoǵam qurý jolyndaǵy bıik belesterdi baǵyndyra alamyz, – dep jazdy Prezıdent.
Aıta keteıik, 31 mamyr – saıası qýǵyn-súrgin jáne asharshylyq qurbandaryn eske alý kúni. Iosıf Stalın basqarǵan jyldary qazaq halqynyń zııaly qaýymy halyq jaýy bolyp jarııalanyp, qysymǵa, qýǵyn-súrginge, qandy qyrǵynǵa ushyrady. Osy saıasattyń aıasynda 100 myńnan astam adam jer aýdarylyp, 25 myńnan astam adam ólim jazasyna kesilgen edi.
Álem ádebıetinde «Úlken terror» atanǵan KSRO-daǵy qýǵyn-súrgin kezeńin Qazaqstanda da umytý múmkin emes. 1993 jyly Qazaqstan táýelsizdigin jarııalaǵannan keıin «Jappaı saıası qýǵyn-súrgin qurbandaryn aqtaý týraly» Zań qabyldandy.
Al 1997 jyldy tuńǵysh prezıdent Nursultan Nazarbaev Jalpyulttyq tatýlyq pen saıası qýǵyn-súrgin qurbandaryn eske alý jyly, sondaı-aq 31 mamyrdy – saıası qýǵyn-súrgin jáne asharshylyq qurbandaryn eske alý kúni dep jarııalady.
Bul shara – jazyqsyz japa shegip, qazaqty egemendi el etemiz dep erkindikke umtylǵan erlerdiń aldyndaǵy boryshty óteýge, paryzdy aqtaýǵa arnalǵan jumystardyń bastaýy.
