14 مامىر كۇنى ۆياچەسلاۆ دۋدنيك دەنساۋلىق ساقتاۋ ۆيتسە-ءمينيسترى قىزمەتىنەن بوساتىعان بولاتىن. بۇل كادرلىق شەشىمنىڭ سەبەبىن باس پروكۋراتۋرا ءتۇسىندىردى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
باس پروكۋراتۋرانىڭ ايتۋىنشا، دۋدنيك پروكۋرورلار شىعارعان قاداعالاۋ اكتىسىنەن كەيىن قىزمەتىنەن ايىرىلدى.
"مەملەكەت باسشىسىنىڭ تاپسىرماسى بويىنشا پروكۋراتۋرا ماڭىزدى ينۆەستيتسيالىق جوبالاردى قولداۋ بويىنشا جۇمىستى جالعاستىرۋدا. بۇل قاداعالاۋ قىزمەتىنىڭ باسىم باعىتتارىنىڭ ءبىرى، مۇنداعى باستى مىندەت ماسەلەلەردى ءتيىمدى شەشۋ، ينۆەستورلاردىڭ قۇقىقتارى مەن زاڭدى مۇددەلەرىن قورعاۋ. اتالعان جۇمىس اياسىندا دەنساۋلىق ساقتاۋ مينيسترلىگى 4 ينۆەستيتسيالىق جوباعا بايلانىستى باس پروكۋراتۋرانىڭ قاداعالاۋ اكتىسى بويىنشا 8 تاپسىرمانى ورىنداماعانى انىقتالدى. ينۆەستيتسيالىق شتابتىڭ نۇسقاۋى بويىنشا دەنساۋلىق ساقتاۋ ۆيتسە-ءمينيسترى ۆ.يۋ.دۋدنيك قىزمەتىنەن بوساتىلدى»، - دەپ حابارلادى قاداعالاۋ ورگانى.
سونىمەن بىرگە، باس پروكۋراتۋرا ورتالىق مەملەكەتتىك ورگاندار باسشىلارىنىڭ بەلگىلەنگەن تالاپتاردى ورىنداماعانى ءۇشىن نەمەسە پرەزيدەنتتىڭ «ەل ەكونوميكاسىنا ينۆەستيتسيا تارتۋ جونىندەگى جۇمىستىڭ تيىمدىلىگىن ارتتىرۋ جونىندەگى شارالار تۋرالى» جارلىعىنا سايكەس ينۆەستيتسيالىق شتاب شەشىمدەرىن تيىسىنشە ورىنداماعانى ءۇشىن جەكە جاۋاپكەرشىلىگىن ەسكە سالدى.
«بۇگىندە پروكۋرورلار ينۆەستورلارعا قاتىستى 225 پروبلەمالىق ءىستى شەشتى، بۇل جۇمىس جالعاسۋدا جانە باس پروكۋراتۋرا باسشىلىعىنىڭ ەرەكشە باقىلاۋىندا»، - دەپ تولىقتىردى ۆەدومستۆو.
