2024 جىلدىڭ 29 مامىرىندا باتىس قازاقستان وبلىسى سىرىم اۋدانى جىمپيتى اۋىلىندا باتىس قازاقستان تاريحي-ولكەتانۋ مۋزەيىنىڭ ءبولىمى سىرىم داتۇلى اتىنداعى تاريحي-ولكەتانۋ مۋزەيىنىڭ جاڭا عيماراتتا اشىلۋىنا ارنالعان «تاريح پەن تاعىلىم ورداسى!» اتتى سالتاناتتى شارا وزدىرىلادى.
اتالعان شاراعا باتىس قازاقستان وبلىسى باتىس قازاقستان وبلىسىنىڭ اكىمدىگى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى قۋانىشبەك جانبولاتۇلى مۇقانعاليەۆ، جازۋشى، ولكەتانۋشى، قازاقستاننىڭ ەڭبەك سىڭىرگەن مادەنيەت قايراتكەرى جايساڭ دوسبولاتۇلى اقباي، سىرىم اۋدانىنىڭ اكىمى جۇماگەلدى جولدىبايۇلى باتىرنيازوۆ، وبلىس جانە اۋدان ارداگەرلەرى، زيالى قاۋىم وكىلدەرى جانە اۋدان تۇرعىندارى قاتىستى.
باتىس قازاقستان وبلىسىنىڭ اكىمدىگى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى قۋانىشبەك جانبولاتۇلى ءوزىنىڭ قۇتتىقتاۋ سوزىندە: «بۇگىن اۋدان ءۇشىن ۇلكەن مارتەبە. ويتكەنى سىرىم داتۇلى اتىنداعى 789 شارشى مەترلىك ەكى قاباتتى مۋزەي ەسىگىن ايقارا اشتى. بۇل مۋزەيدىڭ وبلىستىق ولكەتانۋ مۋزەيىنىڭ فيليالى بولىپ قالىپتاسقانىنا 20 جىل تولدى. مەرەيتوي قارساڭىندا وسى مۋزەيدىڭ اشىلۋى زاڭدىلىق. باتىس قازاقستان وبلىسىنىڭ اكىمى ناريمان تورەعاليەۆ ءوزىنىڭ ىستىق لەبىزىن جولدادى. بۇل مۋزەيدىڭ بەرەر تاعىلىم، تاربيەسى مول. 6000-نان استام جادىگەر قورى بار، 5 ەكسپوزيتسيالىق زالدان تۇراتىن مۋزەيگە وڭىردە العاش بولىپ سىرىم باتىردىڭ ءمۇسىنى قويىلىپ جاتىر. وسى مۋزەيدىڭ باسى-قاسىندا جۇمىس جاساعان ازاماتتارعا، اۋدان اكىمدىگىنە، وبلىستىق ولكەتانۋ مۋزەيىنىڭ قىزمەتكەرلەرىنە العىس بىلدىرەمىز. وبلىستا وسىنداي تاعىلىمى تەرەڭ، جادىگەرگە تولى مادەني نىساننىڭ اشىلعانىنا بەك قۋانىشتىمىز. سىرىم اتامىزدىڭ جەرلەنگەن توپىراعىن وزبەكستاننان ەلگە اكەلگەن ەكسپەديتسيانى باستاعان، ءومىرىن سىرىم داتۇلىن زەرتتەۋگە ارناعان جايساڭ اقباي اعامىز دا ورتامىزدا. ول كىسىگە عاسىرلىق تويىن تويلاۋعا جازسىن دەيمىز. «ءولى رازى بولماي، ءتىرى بايىمايدى» دەگەن بار. سىرىم داتۇلى اتىنداعى جاڭا مۋزەي كۇللى رەسپۋبليكانىڭ ماقتانىشىنا، كورنەكتى مۋزەيىنە اينالۋىنا تىلەكتەسپىز»،- دەدى قۋانىشبەك جانبولاتۇلى.
مۋزەيدىڭ لەنتاسىن قيۋ ءراسىمىن باتىس قازاقستان وبلىسى اكىمدىگى مادەنيەت، تىلدەردى دامىتۋ، دەنە شىنىقتىرۋ جانە ارحيۆ ءىسى باسقارماسىنىڭ باسشىسى قۋانىشبەك مۇقانعاليەۆ، جازۋشى، ولكەتانۋشى، قازاقستاننىڭ ەڭبەك سىڭىرگەن مادەنيەت قايراتكەرى جايساڭ اقباي، ەڭبەك ارداگەرى، سىرىم ۇرپاعى نايمان قايىروۆ جۇرگىزدى.
جاڭا مۋزەيدىڭ ارنايى جاسالعان جاڭا جادىگەرى – سىرىم داتۇلىنىڭ بالاۋىزدان جاسالعان ءمۇسىنى. ءمۇسىندى ەلىمىزدەگى تۇڭعىش گيپەررەاليست ايدوس ەسماعامبەتوۆ جاسادى. ءمۇسىنشى بۇعان دەيىن ابىلاي حاننىڭ، ابايدىڭ، ەلباسى ن.نازارباەۆتىڭ، باراك وبامانىڭ مۇسىندەرىن بالاۋىزدان قۇيۋىمەن تانىمال. سىرىم داتۇلىنىڭ ءمۇسىنى ەل اۋزىندا جۇرگەن اڭىزدارداعى بەينەسىنە، م.جولامانۆتىڭ سالعان سۋرەتتەرىندەگى بەينەسىنە سۇيەنە جاسالعان. تۇلعاسى تاۋداي بولعان باتىر ءمۇسىنىنىڭ بويى 185 سم، ەتىگىنىڭ ولشەمى 44-تەن جوعارى. بۇل ءمۇسىن – قازاقستانداعى تۇڭعىش جاسالعان سىرىم داتۇلىنىڭ بەينەسى.
سىرىم زالىندا «سىرىم جولى» دەپ اتالاتىن ەكسپوزيتسيا قويىلدى. وندا سىرىم شىققان توبەنىڭ، سىرىم بوگەتىنىڭ ماكەتى ورنالاستىرىلعان. سىرىم باتىردىڭ حيۋا حاندىعىنا قايتىس بولعاندىعى بەلگىلى. ۇزەڭگىسى ۋلانىپ، ومىردەن وتكەن باتىردىڭ ەر-توقىمى ۇزەڭگىسىمەن دە مۋزەيدەن ورىن الىپتى. ۇزەڭگىنىڭ ءبىر جاعى ۋمەن اعىپ كەتكەندىكتەن، ءبىر ۇزەڭگىلى عانا ەر توقىم مۋزەيدە تۇر. سىرىمنىڭ 0,20 گرامم كۇمىستەن قۇيىلعان ءمورى دە – زالدىڭ كورنەكتى جادىگەرى. حيۋادان سىرىم بەيىتىنەن اكەلىنگەن ءبىر ۋىس توپىراق تا مۋزەيدەن ورىن تەپكەن.
ايتا كەتەيىك، مۋزەيدە 4399 نەگىزگى جادىگەر بولسا، 1646-سى قوسالقى جادىگەر، بارلىعى 6045 جادىگەر بار. مۋزەيدە 16 قىزمەتكەر جۇمىس جاسايدى. 1 – مەڭگەرۋشى، 2- ەكسكۋرسوۆود، 1- قور ساقتاۋشى، قالعانى كىشى قىزمەتكەرلەر. مۋزەيدىڭ ەكسپوزيتسيا جۇمىستارى 2024 جىلدىڭ قاڭتار ايىندا باستالىپ، 2024 جىلدىڭ مامىر ايىندا اياقتالدى.
